పేలిపోయిన గ్యాస్ ట్యాంకర్: డ్రైవర్ సజీవదహనం?
ఉత్తర కన్నడ: వేగంగా వెళుతున్న గ్యాస్ ట్యాంకర్ అదుపుతప్పి రోడ్డు పక్కన పల్టీ కొట్టడంతో పేలిపోయింది. మంటలు అదుపు చెయ్యడానికి అగ్నిమాపక సిబ్బంది, పోలీసులు నానాతంటాలు పడుతున్నారు.
గ్యాస్ ట్యాంకర్ డ్రైవర్ ఆచూకీ తెలియడం లేదని, అతను సజీవదహనం అయిఉంటాడని పోలీసు అధికారులు అనుమానం వ్యక్తం చేశారు. ఉత్తర కన్నడ జిల్లాలోని కుమటా సమీపంలోని బారగి గ్రామం దగ్గర మంగళవారం వేకువ జామున 5.30 గంటల సమయంలో గ్యాస్ ట్యాంకర్ బెంగళూరు వైపు వేగంగా వెలుతున్నది.
ఆ సందర్బంలో ట్యాంకర్ అదుపుతప్పి పల్టీ కొట్టింది. విషయం తెలుసుకున్న పోలీసు అధికారులు, అగ్నిమాపక సిబ్బంది సంఘటనా స్థలానికి చేరుకున్నారు. పరిసర ప్రాంతాలలో నివాసం ఉంటున్న వారిని ఖాళీ చేయించారు.
ముందు జాగ్రత చర్యగా రహదారికి ఇరు వైపుల రెండు కిలోమీటర్ల మేరకు వాహన సంచారం నిలిపివేశారు. మంగళూరులో ఉన్న గ్యాస్ కంపెనీ నిపుణులు సంఘటనా స్థలానికి చేరుకున్నారు. మంటలు ఇతర ప్రాంతాలకు వ్యాపించకుండా చర్యలు తీసుకుంటున్నారు.