దారుణం: మహిళపై గ్యాంగ్రేప్, ముక్కు కోసేశారు
పాట్నా: బీహార్ రాష్ట్రంలోని సివాన్ జిల్లాలో దారుణ ఘటన చోటు చేసుకుంది. ఓ మహిళపై అత్యాచారానికి పాల్పడిన ఇద్దరు దుర్మార్గులు, అంతటితో ఆగకుండా ఆమె ముక్కును కోసేసి పరారయ్యారు. ఘటనపై కేసు నమోదు చేసుకున్న పోలీసులు, దర్యాప్తు చేస్తున్నారు.
ఈ ఘటన బసంత్పూర్ పోలీస్ స్టేషన్ పరిధిలోని ఖ్వస్పూర్ గ్రామంలోచోటు చేసుకుంది. బాధితురాలిని ఆస్పత్రికి తరలించారు. ఆమె పరిస్థితి కొంత ఆందోళనకరంగా ఉందని వైద్యులు తెలిపారు.
స్థానికుల కథనం ప్రకారం.. బుధవారం రాత్రి ఓ వివాహ కార్యక్రమానికి హాజరయ్యేందుకు బాధిత మహిళ కుటుంబసభ్యులందరూ బయటకి వెళ్లిపోయారు. ఈ విషయాన్ని గమనించిన ఇద్దరు దుండగులు, ఆమె ఇంట్లోకి ప్రవేశించి ఆమెపై సామూహిక అత్యాచారానికి పాల్పడ్డారు.
ఆ తర్వాత పదునైన ఆయుధంతో ఆమె ముక్కును కోసేసి పరారయ్యారు. బాధితురాలి కుటుంబసభ్యుల ఫిర్యాదు మేరకు కేసు నమోదు చేసుకున్న పోలీసులు, నిందితుల కోసం గాలిస్తున్నారు.