అఫ్ఘాన్ మహిళపై ఆస్పత్రి ఉద్యోగి లైంగిక దాడి
న్యూఢిల్లీ: దేశ రాజధానిలో మరో దారుణ ఘటన చోటు చేసుకుంది. ఆఫ్ఘనిస్థాన్ దేశానికి చెందిన 30ఏళ్ల మహిళపై ఢిల్లీలోని ఓ ఆస్పత్రిలోని ఉద్యోగి లైంగిక దాడికి పాల్పడ్డాడు. దీంతో అతడ్ని పోలీసులు అరెస్ట్ చేశారు.
పోలీసుల కథనం ప్రకారం.. తల్లి అనారోగ్యానికి గురికావడంతో ఆమెను ఆస్పత్రిలో చేర్పించింది బాధిత మహిళ. తన తల్లికి సహాయకంగా ఉంటున్న ఆ మహిళపై 21ఏళ్ల అమర్ సింగ్ అనే ఆస్పత్రి ఉద్యోగి లైంగికదాడికి పాల్పడ్డాడు.
ఈ ఘటన జులై 25న దక్షిణ ఢిల్లీలోని మాక్స్ సూపర్ స్పెషాలిటీ ఆస్పత్రిలో చోటు చేసుకుంది. తన తల్లి వార్డులో తన సోదరితోపాటు నిద్రిస్తున్న సమయంలో బాధితురాలిపై ఈ దారుణానికి పాల్పడ్డాడు నిందితుడు.
‘నేను నా సోదరితోపాటు నిద్రిస్తున్న సమయంలో నిందితుడు మా వార్డుకు వచ్చి, నా ప్రైవేటు భాగాలను తాకాడు. అత్యాచారం చేసేందుకు ప్రయత్నించాడు. మెళకువ వచ్చి ఏడుస్తూ కేకలు వేశా. నా సోదరి కూడా అరిచింది. దీంతో సెక్యూరిటీ గార్డు వచ్చి నిందితుడ్ని పట్టుకున్నాడు. ఆ తర్వాత పోలీసులకు సమాచారం ఇచ్చారు' అని బాధితురాలు తన ఫిర్యాదులో తెలిపింది.
నిందితుడ్ని అరెస్ట్ చేసిన పోలీసులు మేజిస్టేట్ ముందు హాజరుపర్చగా, ఆగస్టు 8 వరకు జ్యూడిషియల్ కస్టడి విధించడం జరిగింది.