పెళ్లికి సిద్ధంగా లేనని మహిళా టెక్కీ వెబ్సైట్, లక్షల మంది వ్యూయర్స్
బెంగళూరు: తాను అప్పుడే పెళ్లి చేసుకునేందుకు సిద్ధంగా లేనని ఓ యువతి వెబ్సైట్ను ప్రారంభించింది. ఆ వెబ్సైటును ఇప్పటికే దాదాపు రెండు లక్షల మందికి పైగా వీక్షించారు. తమిళనాడుకు చెందిన ఇందూజా పిళ్లై కర్నాటక రాష్ట్ర రాజధాని బెంగళూరులో ఓ సాఫ్టువేర్ కంపెనీలో ఉద్యోగం చేస్తోంది.
తన వయస్సు 23 అని, ఇప్పుడే పెళ్లికి సిద్ధంగా లేనని, ప్రస్తుతం ప్రపంచం అంటే ఏమిటో తెలుసుకుంటున్నానని, తన జీవితానికి సంబంధించి ఎటువంటి నిర్ణయాలు తీసుకోవడానికైనా ఇంకా సమయం కావాలని, భారత్లో అమ్మాయిలకు ముప్పై ఏళ్లు దాటితో పెళ్లవదనే మాటలు ఎవరు కల్పిస్తారోనని ఆమె తన వెబ్సైట్లో పొందుపరిచింది.
తన బ్లాక్ను చాలామంది చూస్తారని భావించడం లేదని, అంతేకాకుండా, తన పైన విమర్శలు వస్తాయని భావిస్తున్నానని పేర్కొన్నారు. అయితే, అందుకు విరుద్ధంగా తనకు మంచి ప్రతిస్పందన వచ్చిందన్నారు.
ఉత్తరాది నుండి చాలా స్పందన వస్తుండగా దక్షిణాది నుండి తక్కువగా వస్తోందని చెప్పారు. వెబ్ సైట్ గురించి తొలుత తన తల్లిదండ్రులకు చెప్పినప్పుడు ఆశ్చర్యపోయారని, ఆ తర్వాత తనను అర్థం చేసుకున్నారని చెప్పారు.