లైంగిక వేధింపు: వేగంగా వెళ్తున్న ఆటో నుండి దూకిన యువతులు
థానే: మహారాష్ట్రలోని థానేలో ఇద్దరు యువతులు.. ఆటో డ్రైవర్ వేధింపుల నుండి తప్పించుకునేందుకు వేగంగా వెళ్తున్న ఆ ఆటోలో నుండి దూకేశారు. ఈ సంఘటన ఆదివారం రాత్రి తొమ్మిది గంటల సమయంలో జరిగిందని స్థానిక పోలీసులు సోమవారం తెలిపారు.
అఖిల భారత విద్యార్థి పరిషత్ (ఏబీవీపీ) కార్యక్రమానికి వెళ్లిన సారికా పాటిల్ (22), ప్రతిక్ష పూర్ణిక (17)లు ఓ ఆటో ఎక్కారు. వారు మల్హార్ టాకీస్ వద్ద బీవండిలోని తమ బంధువుల ఇంటికి వెళ్లేందుకు ఎక్కారు.
ఆటో కాడ్బరీ జంక్షన్కు చేరుకున్న తర్వాత ఆటో డ్రైవర్ వారిని వేధించే ప్రయత్నం చేశాడు. ఆటోను వారు చెప్పిన వైపు కాకుండా మరో రోడ్డుకు మళ్లించాడు. దానిని వారు గుర్తించారు. గట్టిగా అరిచారు.
ఆటో వేగంగా వెళ్తున్నప్పటికీ.. ఆటో డ్రైవర్ తీరును గమనించి అందులో నుండి దూకేశారు. గాయాలైన వారు పక్కనే కనిపించిన జూపిటర్ ఆసుపత్రిలోకి వెళ్లారు. విర్తక్ నగర్ పోలీసులు కేసు నమోదు చేశారు. ఆటో డ్రైవర్ పైన పలు సెక్షన్ల కింద కేసు నమోదు చేశారు.