ఒబామా హత్యకి ప్లాన్!: వ్యక్తి అరెస్ట్, కత్తులు స్వాధీనం
వాషింగ్టన్: అమెరికా అధ్యక్షుడు బరాక్ ఒబామా హత్యకు పన్నాగం పన్నుతున్నాడన్న ఆరోపణలతో మరో వ్యక్తిని పోలీసులు మంగళవారం అదుపులోకి తీసుకున్నారు. మసాచుసెట్స్కు చెందిన ఆండ్రూ జే ఒకెఫే (28).. తాను ఒబామాను హత్య చేసేందుకు ప్రణాళిక రూపొందిస్తున్నట్లు ఎఫ్బీఐ వెబ్ సైట్లో లేఖ రాశాడు.
దీంతో ఒకెఫెను అదుపులోకి తీసుకున్న పోలీసులు అతడి ఇంటి నుంచి కత్తులు, ఈటెలు, రైఫిల్ వంటి వందకు పైగా ఆయుధాలను స్వాధీనం చేసుకున్నారు.
కాగా, అధ్యక్షుడిని హత్య చేస్తామంటూ బెదిరింపులు రావడం వారంలో ఇది రెండోసారి. ‘అధ్యక్షుడు ఒబామాను హత్యచేసేందుకు ప్రణాళిక వేస్తున్నా. అందుకు నా దగ్గర బ్రహ్మాండమైన ప్లాన్ కూడా ఉంది' అంటూ అతను పోస్ట్ చేశాడు.
అంతకుముందు, అతన్ని పట్టుకునేందుకు ఇంటికి వెళ్లిన పోలీసులను లోపలికి రానివ్వకుండా లోపలి నుండే గంటకుపైగా మాట్లాడాడు. ఆ తర్వాత ఎలాంటి ప్రతిఘటన లేకుండా లొంగిపోయాడు కానీ ఇంటిముందు మాట్లాడటానికి మాత్రం నిరాకరించాడు.