దారుణం: యువతిని తీవ్రంగా కొట్టి, సజీవ దహనం చేశారు
గ్వాటెమాల: ఓ యువతిని తీవ్రంగా కొట్టిన కొందరు, ఆమెను సజీవ దహనం చేశారు. ఈ దారుణ ఘటన ఉత్తర అమెరికా ఖండంలోని గ్వాటెమాల దేశంలో చోటు చేసుకుంది. గ్వాటెమాల నగరానికి సమీపంలోని రియో బ్రావోలో చోటు చేసుకున్న ఈ ఘటన సంచలనంగా మారింది.
అక్కడి మీడియా కథనాల ప్రకారం.. ఓ టాక్సీ డ్రైవర్ను హత్య చేసిన ముఠాలో సభ్యురాలిగా ఆ యువతిని అనుమానించిన మృతుడి బంధువులు, మరికొందరు కలిసి ఆమెను తీవ్రంగా కొట్టారు. రక్తం కారుతున్నా ఏ మాత్రం కనికరం లేకుండా దాడి చేశారు.
అంతటితో ఆగని వారు ఆమెను సజీవ దహనం చేశారు. కాగా, ఈ ఘటన మొత్తాన్ని కొందరు కెమెరాల్లో చిత్రీకరించారు. ఈ దేశంలో ఇలాంటి ఘటనలు తరచుగా జరుగుతుంటాయని అక్కడి మీడియా వెల్లడించింది. ఎక్కువగా పేద వర్గాల్లోనే చోటు చేసుకుంటాయని తెలిపింది.
కాగా, ఆ యువతిని రక్తం వచ్చేలా కొడుతున్న ఆ దుర్మార్గులను అడ్డుకునేందుకు ప్రయత్నించిన పలువురు పోలీసులను కూడా అక్కడి వారు అడ్డుకోవడం విచారకరం.