నటితో ఫ్రాన్స్ అధ్యక్షుడి అఫైర్, ఫొటోల లీక్: ఐదుగురి బదిలీ
పారిస్: ఎలైసీలోని ప్యాలెస్లో ఫ్రాంకోయిస్ హాలెండే నటి జూలీ గయేత్ కలిసి ఉన్న ఫోటోలు లీక్ అయిన సంఘఠనకు సంబంధించి ఐదుగురు అధ్యక్ష సిబ్బందిని బదిలీ చేశారు. ఈ విషయాన్ని శుక్రవారం అధికారులు ధ్రువీకరించారు. ఆ నటితో హాలెండే అఫైర్పై జనవరిలో ప్రపంచవ్యాప్తంగా పత్రికల్లో వార్తాకథనాలు వచ్చాయి.
అయితే, గత వారం ప్యాలెస్లోని ప్రైవేట్ టెర్రాస్లో ఉన్న వారిద్దరి ఫొటోలు బయటకు వచ్చాయి. అవి తీవ్ర కలవరానికి గురి చేశాయి. అవి ఎలైసీలోనివారే తీసినట్లు కనిపించడం ఆ ఆందోళనకు కారణం. హాలాండే (60), గేయెత్ (42) కూర్చున్న ఫొటోలను అక్టోబర్లో రహస్యంగా తీసినట్లు వాటిని ప్రచురించిన వోయిసీ సెలిబ్రిటీ మ్యాగజైన్ తెలిపింది.
ఈ సంఘటనపై దర్యాప్తు జరిగినప్పటికీ నిందితులు ఎవరనేది తేలలేదని లిబరేషన్ డైలీ వ్యాఖ్యానించింది. అయితే, వాటిని అధ్యక్షుడి వ్యక్తిగత సిబ్బంది తీసి ఉంటారని పోలీసులు నమ్ముతున్నారు. మొబైల్ ఫోన్ ద్వారా ఆయన ప్రైవేట్ అపార్టుమెంట్స్లో ఆ ఫోటోలు తీసి ఉంటారని అనుమానిస్తున్నారు.
అధ్యక్షుడి వ్యక్తిగత సేవల కోసం నియోగించిన ఐదుగురు సిబ్బందిని బదిలీ చేసినట్లు అధ్యక్షుడి కార్యాలయం చెప్పినట్లు ఆ పత్రిక రాసింది. స్కూటర్ హెల్మెట్లో హాలండే పారిస్ అపార్టమెంటులో ఆ నటిని కలిసిన ఫొటోలు జనవరిలో తీవ్ర సంచలనం సృష్టించాయి.