ఇదే చివరి హనీమూన్ అనుకున్నా: ‘ఇస్తాంబుల్’ బాధితుడు

ఇస్తాంబుల్: టర్కీలోని ప్రధాన నగరమైన ఇస్తాంబుల్ ఎయిర్‌పోర్టులో మంగళవారం రాత్రి ఉగ్రవాదులు కాల్పులు, ఆత్మాహుతి దాడులకు తెగబడటంతో 41మంది ప్రాణాలు కోల్పోయిన విషయం తెలిసిందే. 200మందికి పైగా ప్రజలు గాయాలపాలయ్యారు. ఈ ఘటనను ప్రత్యక్షంగా చూసిన అమెరికాకు చెందిన జర్నలిస్టు స్టీవెన్ నబీల్ తన ఆవేదనను మీడియాతో పంచుకున్నాడు.

ఆ వివరాల్లోకి వెళితే.. ఇరాక్ దేశంలో పుట్టిన అమెరికాలోని దక్షిణ కాలిఫోర్నియాలో నివాసం ఉంటున్న స్టీవెన్ నబీల్, నార్మిన్ నూతన దంపతులు. ఈ జంట హనీమూన్ కోసం టర్కీకి వెళ్లారు. టర్కీలో వారం రోజులపాటు హనీమూన్ ను సరదాగా గడిపిన ఆ భార్యాభర్తలు తిరిగి న్యూయార్క్ కు వెళ్లడం కోసం మంగళవారం అర్ధరాత్రి ఎయిర్ పోర్టుకు వచ్చారు.

కాగా, ఇస్తాంబుల్‌లోని అటాటర్క్ అంతర్జాతీయ విమానాశ్రయంలో ఉగ్రవాదులు ఆత్మాహుతి దాడులు, కాల్పుల ఘటనతో ఒక్కసారిగా ఉలిక్కిపడ్డారు. ఈ దాడిలో తాము కూడా మరణిస్తామేమోనని వారు ఆందోళనకు గురయ్యారు. ఈ హనీమూనే తమకు చివరిది అవుతుందని తాము భావించామని ఈ నూతన దంపతులు చెప్పారు.

'ఈ హనీమూన్‌తోనే జీవితం ముగిసిందనుకున్నాను... బ్లాక్ డ్రెస్ వేసుకున్న ఓ గన్‌మెన్ ఆయుధంతో ఎయిర్ పోర్టు ఎంట్రీ పాయింట్ వద్దకు వచ్చాడు. రంజాన్ సందర్భంగా ఉపవాసం ఉన్న కొందరు ఆహారాన్ని తీసుకోవడానికి సిద్ధంగా ఉండగా, మరికొందరు ప్రయాణికులు అక్కడ కూర్చుని ఉన్నారు. ఇంతలో ఆ దుండగుడు ఏకే-47తో విచక్షణా రహితంగా కాల్పులు జరిపాడు. ఆ సమయంలో భార్యను కాపాడుకోవడానికి నానా తిప్పలు పడ్డాను' అని నబీల్ వివరించాడు.

ఉగ్రవాది తనకు కేవలం అడుగు దూరంలో ఉన్నప్పుడు గుండె ఒక్కసారిగా ఆగిపోయినట్లు అనిపించిందన్నాడు. ఆ ఉగ్రవాది కాల్పులు జరపడంతో తమ జీవితం ఈ ఒక్క హనీమూన్‌తోనే ముగిసిపోయిందని ఆందోళన చెందినట్లు తెలిపాడు. అయితే అక్కడ ఉన్న ఓ బారీకేడ్ వెనుక దాక్కుని ప్రాణాలు నిలబెట్టుకున్నామని చెప్పాడు. భార్య నార్మిన్‌కు కాస్త గాయాలయ్యాయని, కానీ అరవడం లాంటివి మాత్రం చేయవద్దని సూచించినట్లు పేర్కొన్నాడు.

దాదాపు 10-15 నిమిషాల పాటు కాల్పులు జరిపి అనంతరం ఆ ఉగ్రవాది ఆత్మాహుతి దాడికి పాల్పడ్డాడని తెలిపాడు. అంతకుముందు ఆ ఉగ్రవాది కనిపించిన ప్రతీ ఒక్కరిపై ఉగ్రవాదులు విచక్షణా రహితంగా కాల్పులు జరిపి మారణహోమం సృష్టించారని ఆవేదన వ్యక్తం చేశాడు.

English summary

The 45 minutes my bride and I spent hiding in a beauty salon closet at Ataturk Airport felt like an eternity, as the sound of gunfire and bullets ricocheting through the concourse outside echoed in our ears.