|
ఆటగాడిగా ఎంత నిబద్ధత
ఓ ఆటగాడిగా ఎంత నిబద్ధత ప్రదర్శించాడో.. ఒక కోచ్గా కూడా అనిల్ కుంబ్లే అంతే క్రమశిక్షణతో మెలిగాడని సన్నిహితులు చెప్తున్నారు. కొత్త కోచ్ పదవి ఎంపికపై బోర్డు ఇంకా ఏం తేల్చుకోని నేపథ్యంలో ఛాంపియన్స్ ట్రోఫీ అనంతరం ఇంకో రెండు వారాల పాటు పదవిలో కొనసాగాలని, వెస్టిండీస్ పర్యటనకు వెళ్లాలని బోర్డు కుంబ్లేను కోరింది.
|
వెస్టిండిస్ పర్యటనకు కోచ్గా పొడిగింపు
అయితే వెస్టిండిస్ పర్యటనకు కోచ్గా రెండువారాల పొడిగింపు కుంబ్లేకు ఇచ్చినా.. దానిని ఆయన తిరస్కరించి మంగళవారం రాజీనామా చేశాడు. కోచ్గా తన పద్ధతులపై కెప్టెన్కు అభ్యంతరాలున్నట్లుగా బోర్డు తనకు తెలిపిన నేపథ్యంలో తాను ఈ నిర్ణయం తీసుకుంటున్నట్లు కుంబ్లే స్పష్టం చేశాడు.
|
బీసీసీఐ నుంచి సమాచారం
సోమవారం తాను బీసీసీఐ నుంచి ఓ సమాచారం అందుకున్నానని, ప్రధాన కోచ్గా కొనసాగాలంటే కెప్టెన్ విరాట్ కోహ్లీ సూచించిన విధంగా జట్టు శిక్షణలో కొన్ని మినహాయింపులు పాటించాలని తనని కోరిందని అన్నాడు. కోచ్-కెప్టెన్కు మధ్య సరిహద్దులను తాను ఎప్పుడూ గౌరవించానని, ఆయన తన పాత్ర అతనికి నచ్చకపోవడం ఆశ్చర్యం కలిగించిందని చెప్పాడు.
|
తప్పుకోవడమే మేలనిపించి ఈ నిర్ణయం
కెప్టెన్కు నాకు మధ్య నెలకొన్న విభేదాలను పరిష్కరించేందుకు బీసీసీఐ పూర్తిస్థాయిలో ప్రయత్నించినా మా ఇద్దరి భాగస్వామ్యం అసంపూర్ణంగా ముగిసిందని, దీంతో తప్పుకోవడమే మేలనిపించి ఈ నిర్ణయం తీసుకున్నానని తన రాజీనామా లేఖలో కుంబ్లే పేర్కొన్నాడు.
|
కోహ్లీ తిట్టడం వల్లే కుంబ్లే మనస్తాపం
మరోవైపు కుంబ్లేని కోహ్లీ తిట్టడం వల్లే మనస్తాపం చెంది అర్ధంతరంగా కోచ్ పదవికి రాజీనామా చేసినట్లు వార్తలు కూడా వస్తున్నాయి. ఈ క్రమంలో కుంబ్లేకు సోషల్ మీడియాలో అభిమానులు నీరాజనాలు పడుతున్నారు. కుంబ్లే సేవలను కీర్తిస్తూ వీడ్కోలు పలుకుతున్నారు. కోహ్లీ అహంకారం, అహంభావం వల్లే కుంబ్లే తప్పుకోవాల్సి వచ్చిందని అంటున్నారు.