ఐరన్ లేడీ: జయలలిత మృతిపై ట్విట్టర్‌‌లో ఎవరేమన్నారు

హైదరాబాద్: 75 రోజులుగా ఆసుపత్రిలో మృత్యువుతో పోరాడిన తమిళనాడు ముఖ్యమంత్రి జయలలిత (68) డిసెంబర్ 5 (సోమవారం) రాత్రి కన్నుమూశారు. సోమవారం రాత్రి 11.30కు జయలలిత మృతి చెందినట్లు అపోలో వైద్యులు ప్రకటించిన సంగతి తెలిసిందే.

ఆసుపత్రి నుంచి పార్థివదేహాన్ని అర్ధరాత్రి పోయెస్‌ గార్డెన్‌లోని ఆమె స్వగృహానికి తరలించారు. ప్రజల సందర్శనార్థం అక్కడినుంచి మంగళవారం ఉదయం మౌంట్‌రోడ్‌లోని రాజాజీ హాల్‌కు తరలించారు. జయ మృతి అనంతరం అన్నాడీఎంకే శాసనసభాపక్షం తదుపరి సీఎంగా పన్నీర్‌సెల్వంను ఎన్నుకుంది.

ఇక, జయలలిత మృతితో తమిళనాడు రాష్ట్రం శోకసంద్రంలో మునిగిపోయింది. రాష్ట్ర ప్రభుత్వం వారం రోజులపాటు సంతాప దినాలు ప్రకటించింది. ఆమె మృతి పట్ల దేశ వ్యాప్తంగా పలువురు సంతాపాన్ని వ్యక్తం చేశారు. జయ మృతికి రాష్ట్రపతి, ప్రధాని సహా ప్రముఖులంతా సంతాపం తెలిపారు.

మంగళవారం సాయంత్రం 4.30 గంటలకు చెన్నైలోని మెరీనా బీచ్‌లోని ఎంజీఆర్‌ సమాధి వద్ద అంత్యక్రియలు నిర్వహిస్తున్నారు. జయ మృతితో చెన్నై జనసంద్రమైంది. ఆమె పార్ధీవ దేహాన్ని చూసేందుకు రాష్ట్ర వ్యాప్తంగా జయ అభిమానులు చెన్నైకి చేరుకున్నారు. జయ మృతిపై పలువురు క్రికెటర్లు సంతాపం వ్యక్తం చేశారు.