లండన్ : ఒక్క మ్యాచ్ లో ఐదు వికెట్లు దక్కితేనే బౌలర్లు ఎగిరి గంతేస్తారు. అలాంటిది ప్రత్యర్థి పది వికెట్లన్ని ఒక్కడి ఖాతాలోనే పడితే.. ఆ ఆనందం మామూలుగా ఉండదు. మహారాష్ట్రకు చెందిన 27ఏళ్ల శ్రీకాంత్ ముండే ఈ ఫీట్ సాధించి చూపించాడు.
1999లో పాక్ తో టెస్ట్ మ్యాచ్ సందర్బంగా.. భారత స్పిన్ దిగ్గజం కుంబ్లే మాత్రమే 10/10 ఫీట్ సాధించిన విషయం తెలిసిందే. మళ్లీ ఇన్నాళ్లకు శ్రీకాంత్ ముండే ఆ ఫీట్ సాధించడం భారత క్రికెట్ కు గర్వ కారణంగా మారింది. కోల్విన్ బే క్రికెట్ క్లబ్ వర్సెస్ బిర్కెన్ హెడ్ పార్క్ జట్టు మధ్య ఇంగ్లాండ్ లో జరిగిన మ్యాచ్ లో ఈ ఫీట్ ను సాధించాడు శ్రీకాంత్.
కోల్విన్ బే క్రికెట్ క్లబ్ తరుపున బరిలోకి దిగిన శ్రీకాంత్ దెబ్బకు బిర్కెన్ హెడ్ పార్క్ జట్టు కేవలం 168 పరుగులకే ఆలౌట్ అయింది. లివర్ పూల్ కాంపిటీషన్ ప్రీమియర్ లీగ్ లో 10/10 వికెట్లు తీసిన తొలి బౌలర్ గా ఇప్పుడు శ్రీకాంత్ రికార్డుల్లోకి ఎక్కాడు. మ్యాచ్ లో మొత్తం 24.1 ఓవర్లు బౌలింగ్ చేసిన ముండే.. 85 పరుగులిచ్చి 10 వికెట్లు పడగొట్టాడు. ఆ తర్వాత బ్యాటింగ్ లోను రాణిస్తూ 44 పరుగులతో క్రీజులో ఉన్నాడు.