మనోళ్లకు మరింత నిలకడ అవసరం: గోపీచంద్

హైదరాబాద్: భారత షట్లర్లకు మరింత నిలకడ అవసరమని జాతీయ బ్యాడ్మింటన్ చీఫ్ కోచ్ పుల్లెల గోపీచంద్ అన్నాడు. శుక్రవారం ఇక్కడ కార్పొరేట్ బ్యాడ్మింటన్ లీగ్ సీబీఎల్) ఆధ్వర్యంలో జరిగిన కార్యక్రమంలో గోపీచంద్ పాల్గొన్నాడు.

ఈ సందర్భంగా గోపీచంద్ మాట్లాడుతూ.. ఈ సీజన్ సీబీఎల్‌ను నవంబర్ నెలలో నిర్వహించనున్నట్లు చెప్పాడు. ఇక ఇటీవల భారత షట్లర్లు టాప్ ర్యాంకింగ్ టోర్నమెంట్లలో అంతగా రాణించడం లేదని, ఇందుకు నిలకడలేమే కారణమని తెలిపాడు.

బ్యాడ్మింటన్‌లో మనకెంతో మంది అద్భుత క్రీడాకారులున్నారు. కానీ, ఇటీవల వాళ్లు ఒక టోర్నీలో రాణిస్తే, మరో టోర్నీలో విఫలమవుతున్నారని అన్నాడు. నిలకడగా రాణించడాన్ని వాళ్లు అలవర్చుకోవాలని గోపీచంద్ సూచించాడు.