లిఫ్ట్ ఇచ్చినందుకు ఊహించని షాక్!, బస్ స్ఠాప్లో చుక్కలు చూపించిన యువతి..
బైక్ పై ఉన్నంతసేపు బుద్దిగానే కూర్చున్న ఆ యువతి.. తీరా బస్ స్టాప్ వద్ద దిగగానే యువకుడిని బనాయించడం మొదలుపెట్టింది.
హైదరాబాద్: ఏమాత్రం ఏమరుపాటుగా ఉన్నా.. అమాయకంగా వ్యవహరించినా.. ఇలాంటి అమ్మాయిల చేతిలో దెబ్బయిపోవడం ఖాయం. సహాయం చేయాలంటూ వల విసురుతారు, నిజమేననుకుని ముందుకెళ్తే.. మంచికి పోయి చెడును వెంట తెచ్చుకోవాల్సి వస్తుంది. అచ్చు ఇలాంటి ఘటనే హైదరాబాద్ లో తాజాగా చోటు చేసుకుంది.
ఆదివారం ఉదయం పూట ఓ యువకుడు మాసబ్ ట్యాంక్ నుంచి హిమాయత్ నగర్ వైపు బయలుదేరాదు. మధ్యలో ఎదురైన ఓ యువతి బస్ స్టాప్ వరకు లిఫ్టు కావాలని కోరింది. సరేనని ఎక్కించుకున్న ఆ యువకుడు బస్ స్టాప్ కు కొద్ది దూరంలో దింపాడు. బైక్ పై ఉన్నంతసేపు బుద్దిగానే కూర్చున్న ఆ యువతి.. తీరా బస్ స్టాప్ వద్ద దిగగానే యువకుడిని బనాయించడం మొదలుపెట్టింది.
డబ్బులు ఇవ్వాలని, లేకపోతే అల్లరి చేసి నలుగురిని పిలుస్తానని హెచ్చరించింది. దీంతో ఆ యువకుడికి ఊహించిన షాక్ తగిలినట్లయింది. అయితే ఆమె మాటలకు గనుక అతను లొంగిపోయి ఉంటే పర్సు ఖాళీ చేసుకోవాల్సి వచ్చేది. కానీ ఇంతలోనే బస్ స్టాప్ లో ఉన్న వ్యక్తులు అతని వద్దకు వచ్చి విషయమేంటని ఆరా తీశారు. పరిస్థితి బెడిసికొట్టేలా ఉందనుకున్న యువతి.. అక్కడి నుంచి చల్లగా జారుకుంది.