టాలీవుడ్లో ప్రస్తుతం రీ-రిలీజ్ ట్రెండ్ జోరుగా కొనసాగుతోంది. ఒకప్పుడు బాక్సాఫీస్ను షేక్ చేసిన క్లాసిక్ చిత్రాలు ఇప్పుడు కొత్త సాంకేతిక హంగులతో మళ్లీ థియేటర్లలో సందడి చేస్తున్నాయి. స్టార్ హీరోల సినిమాలతో పాటు, అప్పట్లో కంటెంట్తో సంచలనం సృష్టించిన చిత్రాలు కూడా మరోసారి ప్రేక్షకులను అలరించేందుకు సిద్ధమవుతున్నాయి. ఈ క్రమంలోనే దివంగత దర్శకుడు ఇ.వి.వి. సత్యనారాయణ తెరకెక్కించిన బోల్డ్ అండ్ రియలిస్టిక్ కామెడీ డ్రామా 'ఆరుగురు పతివ్రతలు' మరోసారి వెండితెరపై సందడి చేయబోతోంది.
2004 ఫిబ్రవరి 6న విడుదలైంది 'ఆరుగురు పతివ్రతలు'. సాధారణంగా ఈవీవీ సత్యనారాయణ సినిమాలు అంటే కడుపుబ్బా నవ్వించే కామెడీతో పాటు కుటుంబ విలువలకు పెద్దపీట వేస్తాయి. 'ఆరుగురు పతివ్రతలు' కూడా అదే తరహాలో రూపొందింది. వివాహ జీవితంలో ఒకరినొకరు అర్థం చేసుకోకపోతే ఎలాంటి సమస్యలు వస్తాయి? చిన్న చిన్న అపార్థాలు ఎంత పెద్ద దూరాలకు దారి తీస్తాయి? భార్యాభర్తల మధ్య నమ్మకం ఎంత ముఖ్యమో ఈ చిత్రం వినోదాత్మకంగా చూపించింది. అందుకే విడుదలైన ఇరవై సంవత్సరాల తర్వాత కూడా ఈ సినిమా కథ నేటి పరిస్థితులకు కూడా దగ్గరగా అనిపిస్తుంది.
కథ ఇదే.. పదో తరగతి చదువుకునే రోజుల్లో కొరుకొండలో కలిసి చదువుకున్న ఆరుగురు స్నేహితురాళ్లు.. సంవత్సరాల తర్వాత ఒకరి పెళ్లి సందర్భంగా మళ్లీ కలుసుకుంటారు. ఆ సందర్భంగా తమ తమ వైవాహిక జీవితాల్లో ఎదుర్కొంటున్న అనుభవాలు, భర్తల ప్రవర్తన, కుటుంబ సమస్యలు, సంతోషాలు, బాధలు ఒకరితో ఒకరు పంచుకుంటారు. ప్రతి మహిళ జీవితంలో ఎదురయ్యే విభిన్న పరిస్థితులను, ప్రతి భర్త వ్యక్తిత్వాన్ని వేర్వేరు కోణాల్లో చూపిస్తూ కథ ముందుకు సాగుతుంది. హాస్యం, భావోద్వేగాలు, కుటుంబ అనుబంధాలు కలిసి ఈ సినిమాను ప్రత్యేకంగా నిలబెట్టాయి. 42 మంది కొత్త నటీనటులకు అవకాశం ఈ సినిమా మరో ప్రత్యేకత ఏమిటంటే... దర్శకుడు ఈవీవీ సత్యనారాయణ ఏకంగా 42 మంది కొత్త నటీనటులను తెలుగు చిత్ర పరిశ్రమకు పరిచయం చేశారు. వారితో పాటు ప్రముఖ నటులు ఎల్.బి. శ్రీరామ్, చలపతి రావు, శ్రీకృష్ణ కౌశిక్ తదితరులు కీలక పాత్రల్లో నటించి సినిమాకు మరింత బలం చేకూర్చారు. ఈ చిత్రానికి సంగీత దర్శకుడు కమలాకర్ అందించిన పాటలు, నేపథ్య సంగీతం కథకు తగ్గట్టుగా ఉండి ప్రేక్షకులను ఆకట్టుకున్నాయి. ముఖ్యంగా భావోద్వేగ సన్నివేశాల్లో బ్యాక్గ్రౌండ్ స్కోర్ సినిమాకు మంచి బలం అయింది. త్వరలో రీ-రిలీజ్ తేదీ కాగా అల్లరి నరేష్ పుట్టినరోజు సందర్భంగా చిత్రబృందం ఈ సినిమా రీ-రిలీజ్ పోస్టర్ను విడుదల చేస్తూ అధికారిక ప్రకటన చేసింది. త్వరలోనే అధికారిక విడుదల తేదీని ప్రకటించనున్నట్లు సమాచారం. ఒకప్పుడు నవ్వులతో పాటు ఆలోచింపజేసిన ఈవీవీ క్లాసిక్.. మరోసారి థియేటర్లలో అదే మ్యాజిక్ను రిపీట్ చేస్తుందా? ప్రేక్షకులు ఎలా ఆదరిస్తారో చూడాలి. యూత్ అంతా ఎప్పుడెప్పుడు ఈ సినిమాని రీ రిలీజ్ చేస్తారా అని గత కొంతకాలంగా సోషల్ మీడియాలో జోరుగా చర్చ నడుస్తోంది. ఇప్పుడు ఈ అప్డేట్ తో ఫుల్ బజ్ నెలకొంది.