నటి పావలా శ్యామల తెలుగు ప్రేక్షకులకు సుపరిచితురాలే. సినీ పరిశ్రమలో సుమారు మూడు దశాబ్దాల పాటు రాణించి.. 300కి పైగా చిత్రాల్లో సహాయనటిగా నటించి గుర్తింపు సంపాదించారు. అయితే ప్రస్తుతం ఆమె తీవ్ర ఆర్థిక, ఆరోగ్య ఇబ్బందులను ఎదుర్కొంటున్నారు. ఒకప్పుడు వెండితెరపై తల్లిగా, అత్తగా, పొరుగింటి మహిళగా సహజమైన నటనతో ప్రేక్షకులను అలరించిన ఆమె జీవితం ఇప్పుడు దయనీయ స్థితిలోకి చేరింది. సరైన ఆదాయం లేక, ఆదుకునే స్థిరమైన ఆధారం లేక, తీవ్ర అనారోగ్య సమస్యలతో బాధపడుతూ జీవనం కొనసాగిస్తున్నారు. ఆమెతో పాటు కుమార్తె పరిస్థితి కూడా ఆందోళనకరంగానే ఉండడం గమనార్హం.
కాగా ఇప్పటికే శ్యామలకు 'మా' అసోసియేషన్తో పాటు చిత్ర పరిశ్రమకు చెందిన కొందరు ప్రముఖులు, దాతలు ఆర్థిక సహాయం చేశారు. ఐకాన్ స్టార్ Allu Arjun సైతం ఆమె వైద్య ఖర్చులు, నిత్యావసర అవసరాల కోసం ప్రతి నెలా రూ.10,000 అందేలా ఏర్పాట్లు చేసినట్లు సినీ వర్గాలు చెబుతున్నాయి. కొద్దిరోజుల క్రితం ఆమె చికిత్స నిమిత్తం ఓ ఆసుపత్రికి వెళ్లిన సమయంలో, వైద్య ఖర్చులకు సరిపడా డబ్బులు లేకపోవడంతో ఆమె వెనుదిరగాల్సి వచ్చింది. ఆ క్రమంలో కారు డ్రైవర్ ఆమెను మధ్యలోనే రోడ్డుపై వదిలేసి వెళ్లిపోయాడు. దాంతో రోడ్డుపై అనాథగా మిగిలిన ఆమెను కొందరు స్థానికులు గుర్తించి, ఒక స్వచ్ఛంద సంస్థకు అప్పగించారు.
మళ్లీ సేమ్ సీన్.. ఇప్పుడు మళ్లీ హైదరాబాద్ ఎర్రగడ్డలోని ప్రభుత్వ ఛాతీ ఆసుపత్రి ఆవరణలో పావలా శ్యామల, ఆమె కుమార్తె మాధవిలను కొందరు గుర్తుతెలియని వ్యక్తులు వదిలివెళ్లారు. దిక్కుతోచని స్థితిలో ఉన్న వారిని గమనించిన ఆసుపత్రి సిబ్బంది వెంటనే అధికారుల దృష్టికి తీసుకెళ్లారు. హాస్పిటల్ సూపరింటెండెంట్ ఆదేశాల మేరకు వైద్యులు వారికి క్షయ (టీబీ) పరీక్షలు నిర్వహించగా నెగెటివ్ వచ్చిందని సమాచారం. కానీ తీవ్రమైన శారీరక ఇబ్బందులు ఉండటంతో వారిని మెరుగైన చికిత్స కోసం వారిని ఉస్మానియా ఆసుపత్రికి తరలించారు. అయితే అక్కడ ఉండలేక వారు సాయంత్రానికి మళ్లీ ఛాతీ ఆసుపత్రికే తిరిగి వచ్చారని అంటున్నారు. ఈ మేరకు ఆస్పత్రి వర్గాలు బోరబండ పోలీసులకు సమాచారం ఇవ్వగా.. పోలీసుల వారిద్దరినీ నగరంలోని ఒక అనాథాశ్రమానికి తరలించినట్టు చెబుతున్నారు. ఒకప్పుడు థియేటర్లలో నవ్వుల కురిపించిన నటి.. జీవిత చరమాంకంలో ఇలాంటి దుస్థితిని ఎదుర్కొంటూ ఉండడం పట్ల సోషల్ మీడియాలో నెటిజన్లు ఆవేదన వ్యక్తం చేస్తున్నారు. ఆమెకు సరైన ఆర్దిక ప్రణాళికా లేకపోవడమే ఈ దుస్థితికి కారణం అంటూ కామెంట్స్ చేస్తున్నారు.