టాలీవుడ్ యంగ్ హీరో సందీప్ కిషన్ కెరీర్లో మరో భారీ మూవీ పడింది. ఓ సోషియో ఫాంటసీ చిత్రం ద్వారా తెరపై రాబోతోన్నాడు. ఇంతకుముందు ఊరి పేరు భైరవకోనలో నటించాడు గానీ ఇది ఫుల్ ప్లెడ్జ్డ్ మిస్టికల్ థ్రిల్లర్. ఈ చిత్రానికి కరికాల అనే పవర్ఫుల్ టైటిల్ను ఖరారు చేశారు. ఈ మేరకు చిత్రం యూనిట్ ఫస్ట్ లుక్ పోస్టర్ను కూడా విడుదల చేసింది. ఈ ఫిల్మ్.. తెలుగుతో పాటు తమిళం, హిందీ భాషల్లో పాన్ ఇండియా స్థాయిలో రూపుదిద్దుకుంటోంది.
దీనికి దర్శకుడు మరెవరో కాదు.. యుగంధర్ ముని. ఇదివరకు శంభాల తీశాడు. గత ఏడాది డిసెంబర్ లో విడులైన ఈ మూవీ.. సూపర్ హిట్ అయింది. ఆది సాయికుమార్ కేరీర్ లోనే బిగ్గెస్ట్ హిట్ గా నిలిచింది. ఇప్పుడు దాదాపుగా అదే జానర్ ను ఎంచుకున్నాడు యుగంధర్ ముని. కరికాల పేరుతో మిస్టిక్, మైథలాజికల్ థ్రిల్లర్ ను తెరకెక్కిస్తోన్నాడు. సందీప్ కిషన్ ను ఓ వారియర్ గా చూపించబోతోన్నాడీ యంగ్ డైరెక్టర్.
ఈ మూవీ ఫస్ట్ లుక్ గూస్ బంప్స్ తెప్పిస్తోంది. ఓ యుధుడి గెటప్ లో కనిపించాడు సందీప్ కిషన్. చేతిలో కత్తి పట్టుకుని, గుర్రంపై అడవిదారుల గుండా దూసుకెళ్తూ దర్శనం ఇచ్చాడు. ఆ గుర్రం పక్కనే జూలు విదిల్చిన ఓ సింహం కూడా పరుగెత్తుతుండటం ఈ పోస్టర్కు మరింత సీరియస్ లుక్ ను తీసుకొచ్చింది. ప్రాచీన కాలం నాటి యుద్ధ నేపథ్యం, ఫాంటసీ అంశాల కలయికగా ఈ సినిమా ఉండబోతుందని ఈ ఫస్ట్ లుక్ స్పష్టం చేస్తోంది. శ్రీచరణ్ పాకాల ఈ చిత్రానికి సంగీతాన్ని సమకూర్చుతున్నాడు. షైనింగ్ పిక్చర్స్ పతాకంపై మహీధర్ రెడ్డి, రాజశేఖర్ అన్నభిమోజు ఈ చిత్రాన్ని నిర్మిస్తోన్నారు. రెండు భాగాలుగా తెరకెక్కుతున్న ఈ మూవీ విడుదల తేదీలను కూడా మేకర్స్ ప్రకటించడం ప్రాధాన్యతను సంతరించుకుంది. పార్ట్ 1 వచ్చే ఏడాది జూలై 2న, పార్ట్ 2.. అదే ఏడాది అక్టోబర్ 28వ తేదీన విడుదల కానుంది. ఇతర నటీనటులు, సాంకేతిక వర్గానికి సంబంధించిన మరిన్ని వివరాలు త్వరలోనే వెల్లడి కానున్నాయి.వరల్డ్ కప్ కోసం టీమిండియా లెజెండ్ సెలెక్ట్ చేసిన మెరికలు- వీళ్లే ఉంటే దుమ్ము రేపుతారు