రొటీన్ లైఫ్ లో వీటికోసం ఒక్క అరగంట కేటాయించినా చాలు

శరీరంలో పేరుకుపోయిన అదనపు కొవ్వును వేగంగా కరిగించడంతో పాటు, బరువు పెరగడానికి కారణమయ్యే హార్మోన్ల అసమతుల్యతను అరికట్టడం కూడా అత్యంత కీలకమైన అంశం. అందుకే ఈ శారీరక కదలికలు, శ్వాస నియంత్రణ పద్ధతులు విడివిడిగా ఎలా పనిచేస్తాయి, క్రమబద్ధమైన ఫలితాల కోసం వేటిని ఎలా ఎంచుకోవాలో పూర్తి శాస్త్రీయ విశ్లేషణను ఇక్కడ పరిశీలిద్దాం.

సూర్య నమస్కారాలు: క్యాలరీలు కరిగించే సంపూర్ణ శారీరక వ్యాయామం

సూర్య నమస్కారాలు ఒక ఆసనానికి పరిమితం కాదు, అది 12 విభిన్న శారీరక భంగిమల అద్భుత కలయిక. తల నుండి కాలి వేళ్ల వరకు శరీరంలోని ప్రతి ప్రధాన భాగాన్ని కదిలించే ప్రక్రియ ఇది. వెన్నెముక సాగడం, చేతులు, ఛాతీ, పొత్తికడుపు కండరాలు బలోపేతం కావడం వంటి ప్రయోజనాలు దీని సాధన ద్వారా లభిస్తాయి. సాధారణంగా శరీర బరువును గణనీయంగా తగ్గించుకోవడానికి కార్డియో వ్యాయామాలు ఎంతో తోడ్పడతాయి.

సూర్య నమస్కారాలను వేగంగా చేయడం వల్ల అది అత్యుత్తమ కార్డియో వ్యాయామంగా మారుతుంది. దీనివల్ల గుండె స్పందనల రేటు పెరిగి, శరీరంలో రక్త సరఫరా ముమ్మరమవుతుంది. ఇది నిల్వ ఉన్న కొవ్వు కణాలను విచ్ఛిన్నం చేసి, వాటిని శక్తిగా మార్చడంలో సహాయపడుతుంది. సుమారు అర గంట పాటు సూర్య నమస్కారాలు చేయడం వల్ల దాదాపు 250 నుండి 350 క్యాలరీల వరకు ఖర్చవుతాయి. పొత్తికడుపు చుట్టూ పేరుకుపోయిన కొవ్వును కరిగించడంలో సూర్య నమస్కారాలు అద్భుతమైన ఫలితాలను ఇస్తాయి. ప్రతిరోజూ సూర్యోదయ సమయంలో సూర్యనమస్కారాలు ఖాళీ కడుపుతో చేస్తుండడం వల్ల శరీర జీవక్రియ రేటు పెరుగుతుంది.

ప్రాణాయామం..

శ్వాస మీద ధ్యాస పెడుతూ చేసే ప్రక్రియల సమాహారమే ప్రాణాయామం. ఇది శారీరక కదలికల కంటే కూడా మానసిక స్థిరత్వం, అంతర్గత అవయవాల అవగాహన పైనే ఎక్కువ దృష్టి పెడుతుంది. శరీరంలో తగినంత ఆక్సిజన్ సరఫరా పెరగడం వల్ల కణాల స్థాయిలో రసాయన చర్యలు మెరుగవుతాయి. ఇది పరోక్షంగా బరువును సమతుల్యం చేయడానికి దోహదం చేస్తుంది.

ప్రాణాయామాలలో ముఖ్యంగా కపాల్‌భాతి, భస్త్రిక వంటి పద్ధతులు పొత్తికడుపు లోపలి అవయవాలపై తీవ్ర ప్రభావాన్ని చూపుతాయి. కపాల్‌భాతి ప్రాణాయామంలో శ్వాసను వేగంగా వదిలే ప్రక్రియ వల్ల పొట్ట భాగంలో కదలికలు సంభవిస్తాయి. ఇది జీర్ణక్రియను మెరుగుపరుస్తుంది. కాలేయం, ప్యాంక్రియాస్ పనితీరు మెరుగుపడుతుంది. శరీరంలో పేరుకుపోయిన వ్యర్థాలు తొలగిపోతాయి.

శరీరంలో ఆక్సిజన్ స్థాయిలు పెరిగినప్పుడు కొవ్వు ఆక్సీకరణ ప్రక్రియ మరింత సులువవుతుంది. అంటే, శరీరంలో నిల్వ ఉన్న అదనపు కొవ్వు కరగడానికి ఆక్సిజన్ ఇంధనంగా పనిచేస్తుంది. ఫలితంగా తక్కువ శారీరక శ్రమతోనే మీ శరీరం అంతర్గతంగా కొవ్వును కరిగించే సామర్థ్యాన్ని పెంచుకుంటుంది. ఇది దీర్ఘకాలికంగా స్థూలకాయాన్ని నియంత్రించడంలో సహాయపడుతుంది. మానసిక ఒత్తిడికి గురైనప్పుడు శరీరంలో కార్టిసాల్ అనే హార్మోన్ అధికంగా విడుదలవుతుంది. ఇది హార్మోన్ పొట్ట చుట్టూ కొవ్వు రూపంలో నిల్వలను పెంచుతుంది. ప్రశాంతమైన అనులోమ విలోమ, భ్రామరి వంటి ప్రాణాయామాలు మెదడును ప్రశాంతపరిచి, ఒత్తిడి హార్మోన్ల విడుదలను అరికడతాయి.

బరువు తగ్గడానికి ఏ సాధనకు మొదటి ప్రాధాన్యత ఇవ్వాలి?

ఒకవేళ మీ ప్రధాన లక్ష్యం కేవలం శరీరాకృతిని మార్చడం, వేగంగా క్యాలరీలను దహనం చేయడమే అయితే, మీరు ఖచ్చితంగా సూర్య నమస్కారాలకే మొదటి ప్రాధాన్యత ఇవ్వాలి. ఎందుకంటే ఇవి మీ శరీరంలో తక్షణ శారీరక స్పందనను కలుగజేసి, కొవ్వును వేగంగా కరిగిస్తాయి. రోజూ కనీసం 12 ఆవృత్తుల సూర్య నమస్కారాలు చేయడం ద్వారా స్పష్టమైన మార్పులను చూడవచ్చు.

శారీరక ఒత్తిడి లేకుండా..

మరోవైపు, వయసు పెరగడం వల్ల లేదా కీళ్ల నొప్పులు, గుండె జబ్బులు, వెన్నునొప్పి వంటి తీవ్రమైన ఆరోగ్య సమస్యల కారణంగా కఠినమైన శారీరక వ్యాయామాలు చేయలేని వారు ప్రాణాయామానికి ప్రాధాన్యత ఇవ్వాలి. ఇది ఎలాంటి శారీరక ఒత్తిడి లేకుండా శరీర అంతర్గత వ్యవస్థలను శుభ్రపరిచి, నెమ్మదిగా, ఆరోగ్యకరమైన రీతిలో బరువు తగ్గడానికి సహాయపడుతుంది.

ఆహార ప్రియుల్లో ఉండే అతిగా తినే అలవాటును అరికట్టడంలో ప్రాణాయామం అద్భుతమైన పాత్ర పోషిస్తుంది. ఇది ఆకలి సంకేతాలను నియంత్రించడంలో సహాయపడుతుంది. కాబట్టి, హార్మోన్ల అసమతుల్యత లేదా థైరాయిడ్ సమస్యల కారణంగా ఊబకాయం బారిన పడిన వారికి ప్రాణాయామ సాధన ఎల్లప్పుడూ మొదటి ప్రాధాన్యతగా ఉండాలని ఆరోగ్య నిపుణులు సూచిస్తున్నారు.