vastu tips: వాస్తు ప్రకారం పూజగదిలో ఈ రెండు విగ్రహాలు పక్కపక్కనే ఉండకూడదు

శ్రీకృష్ణుని సరసన రాధా-రుక్మిణుల కలయిక వద్దు

శ్రీకృష్ణుని ఆరాధించేటప్పుడు రాధ సమేతుడైన కృష్ణుడిని కానీ, లేదా రుక్మిణీ సమేతుడైన పరమాత్ముడిని కానీ పూజించడం శ్రేయస్కరం. అంతే తప్ప, రాధ, రుక్మిణి ఇద్దరి రూపాలను ఒకే వేదికపై పక్కపక్కనే ఉంచకూడదు. ఈ రకమైన అమరిక గృహస్థుల దాంపత్య బంధంలో అనవసరమైన వైరుధ్యాలకు, మనస్పర్ధలకు దారితీస్తుందని విశ్వసిస్తారు.

ఒకే దైవం.. ద్వంద్వ రూపాల ముఖాముఖి

చాలామంది ఇళ్లలో ఇద్దరు వినాయకులు లేదా ఇద్దరు లక్ష్మీదేవుల ప్రతిమలు పక్కపక్కనే ఉండటం చూస్తుంటాం. ఒకే దేవుడికి చెందిన రెండు విగ్రహాలను లేదా పటాలను పక్కపక్కనే అమర్చడం కానీ, లేదా ఒకదానికొకటి ఎదురెదురుగా ఉంచడం కానీ కూడదు. దీనివల్ల ఇంట్లో స్థిరమైన పురోగతి లోపించి, వ్యయాలు ఆకాశాన్ని తాకుతాయని అంటారు.

vastu tips: వాస్తు ప్రకారం ఇంట్లో ఆర్టిఫిషియల్ మొక్కలు ఉండొచ్చా?

శాంతమూర్తుల చెంత ఉగ్రస్వరూపాలు తగవు

సాధారణంగా గృహస్థులు నిత్య పూజలలో శాంత స్వరూపులైన దేవతలను అర్చించడం వల్ల మనస్సు ప్రశాంతంగా ఉంటుంది. లక్ష్మీదేవి, సరస్వతీ దేవి వంటి సౌమ్యమూర్తుల పక్కన రౌద్రరూపంలో ఉన్న కాళికాదేవి లేదా మహిషాసురమర్దిని ప్రతిమలను ఉంచకూడదు. ఉగ్రరూప విగ్రహాలు గృహంలో ఆవేశాలను, మానసిక అలజడులను పెంచుతాయి.

లక్ష్మీదేవికి ఎడమవైపు గణపతి ఉండాలి

పండుగల్లో లక్ష్మీదేవిని, విఘ్నేశ్వరుడిని జంటగా పూజించడం పరిపాటే. అయితే, నిత్యార్చన చేసే పీఠంపై లక్ష్మీదేవికి ఎడమ వైపున మాత్రమే గణపతిని ప్రతిష్ఠించాలి. లక్ష్మీదేవికి గణపతి బిడ్డలాంటివాడు కాబట్టి, సనాతన సంప్రదాయం ప్రకారం పుత్రస్థానమైన ఎడమవైపున వినాయకుడిని ఉంచడమే శాస్త్ర సమ్మతం.

కాస్తంత గ్యాప్ ఉంచాలి

దేవుడి పీఠంపై ఉన్న విగ్రహాలు గానీ, ఫోటోలు గానీ ఒకదానికొకటి తాకుతూ ఒత్తుగా ఉండకూడదు. ప్రతి ప్రతిమ మధ్య కొంత ఖాళీ స్థలం ఉండటం వల్ల ఆధ్యాత్మిక తరంగాలు స్వేచ్ఛగా ప్రసరిస్తాయి. అలాగే, చిట్లిపోయిన లేదా స్వల్పంగా దెబ్బతిన్న విగ్రహాలను పూజా గదిలో ఉంచకుండా, నదీజలాల్లో విసర్జించడం శ్రేయస్కరం.