Video: జాతి వైరం మరిచింది.. అనాథ కుక్కపిల్లలకు అమ్మగా మారింది!

"భాష తెలియని మూగ జీవులవి.. కానీ, ప్రేమే శ్వాసగా బతికే ప్రాణాలవి! కన్నతల్లి కనుమూస్తే.. కడుపుకోతను చూసి తట్టుకోలేకపోయాయి, జాతి భేదాల సరిహద్దులు చెరిపేసి.. మాతృత్వపు ఒడిని పరిచాయి!" సృష్టిలో మాతృత్వానికి మించిన మధురమైన అనుభూతి మరొకటి లేదు. ఆ మాతృత్వం కేవలం మనుషులకే పరిమితం కాదని, మూగజీవాల్లోనూ అంతకుమించిన మమకారం, ప్రేమానురాగాలు ఉంటాయని నిరూపించే ఒక హృదయాన్ని కదిలించే అద్భుత ఘట్టం కర్నూలు జిల్లా కోసిగి మండలం జంపాపురం గ్రామంలో ఆవిష్కృతమైంది. కన్నతల్లిని కోల్పోయి అనాథలుగా మారిన కొన్ని కుక్కపిల్లలను, ఓ వరాహం (పంది) చేరదీసి వాటి ఆకలి తీరుస్తూ కంటికి నైరుతిగా కాపాడుకుంటోంది.

కొద్దిరోజుల క్రితం జంపాపురం గ్రామంలో ఓ కుక్క కొన్ని పిల్లలకు జన్మనిచ్చింది. అయితే విధి ఆ చిన్న ప్రాణాలపై కరుణించలేదు. అనారోగ్య కారణాలతో ఆ తల్లి కుక్క ఇటీవల మృతి చెందింది. కళ్లు కూడా సరిగ్గా తెరవని ఆ పసి కుక్కపిల్లలు, తల్లి పాలు లేక ఆకలితో అల్లాడుతూ దిక్కులేని స్థితిలో మిగిలిపోయాయి. ఆ పసి ప్రాణాల ఆకలి కేకలు, తల్లి కోసం అవి పడే రోదన ఆ ఊరిలో తిరిగే ఓ వరాహాన్ని కదిలించింది.