సికింద్రాబాద్, విజయవాడ, విశాఖ మీదుగా వెళ్లే ఈ రైళ్లు ఈ తేదీల్లో రద్దు- ఇవి దారిమళ్లింపు..!!

రైల్వే శాఖ కీలక ప్రకటన చేసింది. ప్రయాణీకులకు బిగ్ అలర్ట్ జారీ అయింది. ఖాజీపేట-కొండపల్లి మార్గంలో నాన్​ ఇంటర్ లాకింగ్ పనుల కారణంగా పలు ప్రధాన రైళ్లను రద్దు చేస్తున్నట్లు అధికారులు ప్రకటించారు. అదే సమయంలో మరికొన్నింటిని దారి మళ్లిస్తున్నట్లు వెల్లడించింది. ఆగస్టు 15 నుంచి ఆగస్టు 19 వరకు ఐదు రోజుల పాటు ఈ రైళ్లు రద్దు కానున్నాయి. ఈ మేరకు అడ్వాన్స్ బుకింగ్, ప్రయాణాల్లో మార్పులకు వీలుగా రైల్వే శాఖ రద్దయిన రైళ్ల వివరాలు.. దారి మళ్లించిన వాటి షెడ్యూల్ ప్రకటించింది.

ఆగస్టు 15 నుంచి 19వ తేదీ వరకు డోర్నకల్- విజయవాడ మధ్య నడిచే రైళ్లను రద్దు చేసారు. అదే విధంగా భద్రాచలం రోడ్ - విజయవాడ రైళ్లు, విజయవాడ- సికింద్రాబాద్ డైలీ, గుంటూరు- సికింద్రాబాద్ మధ్య రోజూ నడిచే రైలుతో పాటుగా విశాఖపట్నం - మహబూబ్ ​నగర్ డైలీ (ఆగస్టు 16, 17, 18 తేదీల్లో రద్దు), కాకినాడ టౌన్‌ - లింగంపల్లి (ఆగస్టు 16, 17, 18 తేదీల్లో రద్దు) చేసారు. ఇక, సికింద్రాబాద్ - మణుగూరు డైలీ, ఖాజీపేట - దోర్నకల్ డైలీ ఆగస్టు 15 నుంచి 19 వరకు రద్దు చేస్తున్నట్లు ప్రకటించారు. కాగా.. 18519 విశాఖపట్నం-లోకమాన్యతిలక్‌ టెర్మినల్‌ రైలు ఆగస్టు 14 నుంచి 18 వరకు ప్రత్యామ్నాయ మార్గంలో రాకపోకలు సాగించనుంది. ఈ రైలు విజయవాడ - గుంటూరు - పగిడిపల్లి - సికింద్రాబాద్ మార్గంలో నడిపించనున్నారు. 18520 ఎల్​టీటీ ముంబై - విశాఖపట్నం డైలీ ఎక్స్​ ప్రెస్ ఆగస్టు 14 నుంచి 18 వరకు ప్రత్యామ్నాయ మార్గంలో నడవనుంది.