ఆంధ్రప్రదేశ్ లోని గుంటూరు జిల్లాలో దారుణ ఘటన చోటుచేసుకుంది. భార్యను తిరిగి కాపురానికి పంపడం లేదన్న ఆగ్రహంతో.. తన అత్తమామలను అల్లుడు కారుతో ఢీ కొట్టాడు. ఈ ఘటనలో ఇద్దరికీ తీవ్ర గాయాలు కాగా, స్థానికులు వెంటనే స్పందించి ఆస్పత్రికి తరలించారు. ఘటనపై కేసు నమోదు చేసిన పోలీసులు ప్రధాన నిందితుడితో పాటు మరో ఇద్దరిని అరెస్ట్ చేశారు. దీంతో ఈ వ్యవహారం రాష్ట్ర వ్యాప్తంగా చర్చనీయాంశంగా మారింది.
పోలీసులు తెలిపిన వివరాల ప్రకారం..
గుంటూరు జిల్లా మంగళగిరికి చెందిన శ్రీనివాసరావు, పద్మావతి దంపతుల కుమార్తెకు కొంతకాలం క్రితం వివాహం జరిగింది. అయితే దాంపత్య జీవితంలో తలెత్తిన విభేదాల కారణంగా ఆమె పుట్టింట్లోనే ఉంటోంది. అయితే భార్యను తిరిగి తన వద్దకు పంపాలని అల్లుడు పలుమార్లు కోరినప్పటికీ.. వారు అంగీకరించలేదని సమాచారం. ఈ వ్యవహారం రెండు కుటుంబాల మధ్య తీవ్ర వివాదానికి దారితీసింది.
ఈ క్రమంలో తీవ్ర ఆగ్రహానికి గురైన అల్లుడు, తనకు పరిచయమైన మరో ఇద్దరితో కలిసి కారులో మంగళగిరికి చేరుకున్నాడు. అత్తమామలు రోడ్డుపై కనిపించగానే వారిపై కారును వేగంగా దూసుకెళ్లినట్లు ప్రాథమిక విచారణలో గుర్తించారు. ఢీకొట్టిన వేగానికి శ్రీనివాసరావు, పద్మావతి రోడ్డుపై పడిపోగా వారికి తీవ్ర గాయాలయ్యాయి. ఘటనను ప్రత్యక్షంగా చూసిన స్థానికులు వెంటనే స్పందించి క్షతగాత్రులను సమీప ఆస్పత్రికి తరలించారు. ప్రస్తుతం వారికి వైద్యులు చికిత్స అందిస్తున్నారు. సమాచారం అందుకున్న పోలీసులు వెంటనే ఘటనాస్థలానికి చేరుకుని సీసీటీవీ ఫుటేజ్, ప్రత్యక్ష సాక్షుల వాంగ్మూలాలు సేకరించారు. నిందితుడిని పరారయ్యేలోపే అదుపులోకి తీసుకోగా, ఘటనలో సహకరించిన మరో ఇద్దరినీ అరెస్ట్ చేశారు. వారిపై హత్యాయత్నం సహా పలు సెక్షన్ల కింద కేసులు నమోదు చేసినట్లు పోలీసులు తెలిపారు. ఈ విధంగా చేయడం కోసం ముందుగానే ప్రణాళిక వేసుకున్నట్లు పోలీసులు భావిస్తున్నారు.