బెంగళూరులో 11 నెలల చిన్నారి మరణం కేసు ప్రమాదం కాదని, హత్యగా పోలీసులు అనుమానించి దర్యాప్తు చేపట్టిన తర్వాత షాకింగ్ విషయాలు బయటపడ్డాయి. ఆసుపత్రికి తీసుకువచ్చే సమయానికి చిన్నారి మృతి చెందగా, శరీరంపై కనిపించిన గాయాలు వైద్యుల్లో అనుమానాలు రేకెత్తించాయి. దీంతో అవలహళ్లి పోలీసులు కేసును నమోదు చేసి తల్లిదండ్రులను ప్రశ్నించారు.
పోలీసుల ప్రాథమిక దర్యాప్తు ప్రకారం, చిన్నారి తల్లిదండ్రులు శేఖప్ప, విజయలక్ష్మి మొదట పాప ప్రమాదవశాత్తు కిందపడిందని చెప్పారు. అయితే గాయాల స్వభావం, వైద్యుల పరిశీలన వారి వాదనకు సరిపోలలేదు. పోస్ట్మార్టం ప్రాథమిక వివరాల్లో బలప్రయోగం వల్లే గాయాలు ఏర్పడి ఉండొచ్చని తేలడంతో దర్యాప్తు దిశ మారింది.
జూన్ 9న మధ్యాహ్నం భోజనానికి ఇంటికి వచ్చిన శేఖప్పకు భార్య విజయలక్ష్మితో వాగ్వాదం జరిగినట్లు పోలీసుల దర్యాప్తులో వెల్లడైంది. అదే సమయంలో పాప ఏడవడంతో విజయలక్ష్మి కాలితో తన్నినట్లు, ఆ తర్వాత ఆవేశంలో శేఖప్ప చిన్నారిని ఎత్తి నేలకేసి విసిరినట్లు పోలీసులు తెలిపారు. ఆ దెబ్బల వల్ల పాపకు తీవ్ర అంతర్గత గాయాలు అయినట్లు అనుమానిస్తున్నారు. చిన్నారి చనిపోయిన తర్వాత ఈ ఘటనను ప్రమాదంలా చూపించేందుకు దంపతులు ప్రయత్నించినట్లు పోలీసులు భావిస్తున్నారు. ఇద్దరినీ విడివిడిగా విచారించగా వారి వాంగ్మూలాల్లో తేడాలు కనిపించాయని సమాచారం. వైద్య ఆధారాలు, పోస్ట్మార్టం వివరాలు, స్థానికుల వాంగ్మూలాల ఆధారంగా పోలీసులు హత్య కోణంలో కేసు నమోదు చేశారు. ఆ దంపతుల మధ్య తరచూ గొడవలు జరిగేవని సాక్షుల వాంగ్మూలాల్లో వచ్చినట్లు తెలుస్తోంది. విజయలక్ష్మి వ్యక్తిగత సంబంధాలపై కూడా స్థానికులు కొన్ని ఆరోపణలు చేసినట్లు సమాచారం. అయితే ఈ ఆరోపణలు కేసు దర్యాప్తులో భాగంగా ఇంకా పరిశీలనలోనే ఉన్నాయి. పోలీసులు ప్రస్తుతం నిర్ధారిత వైద్య, ఫోరెన్సిక్ ఆధారాలపై దృష్టి పెట్టారు. శేఖప్ప, విజయలక్ష్మిపై హత్యతో పాటు సాక్ష్యాలను తారుమారు చేయడానికి ప్రయత్నించిన సెక్షన్ల కింద కేసు నమోదు చేసినట్లు పోలీసులు తెలిపారు. చిన్నారి మరణానికి దారితీసిన ఖచ్చితమైన పరిస్థితులు, ఘటన తర్వాత నిందితుల చర్యలు, సాక్షుల వాంగ్మూలాలను సమగ్రంగా పరిశీలిస్తున్నామని అధికారులు వెల్లడించారు. ఈ ఘటన స్థానికంగా తీవ్ర ఆగ్రహం రేపింది.గొడవ మధ్యలో పాపపై దాడి
దంపతుల మధ్య తరచూ గొడవలు