అర్ధరాత్రి ఘోర ప్రమాదం: వందేళ్ల కాలం నాటి ఇల్లు కూలి కుటుంబం బలి!

మహులి ప్రాంతమంతా గాఢ నిద్రలో ఉన్న తెల్లవారుజామున సుమారు 2 గంటలకు ఈ ప్రమాదం జరిగింది. దాదాపు వందేళ్ల నాటి శిథిలావస్థలో ఉన్న ఆ ఇల్లు ఎడతెరిపి లేకుండా కురుస్తున్న భారీ వర్షాన్ని తట్టుకోలేకపోవడంతో పై అంతస్తు పైకప్పు నేరుగా కింది అంతస్తుపై కూలిపోయింది. ఇంట్లో ఉన్న ఏడుగురు శిథిలాల కింద కూరుకుపోయారు. అరుపులు విన్న సమీపంలోని ప్రజలు ఘటనాస్థలికి పరిగెత్తుకొచ్చి వెంటనే పోలీసులకు, అగ్నిమాపక సిబ్బందికి ఫోన్ చేశారు. తెల్లవారుజామున సుమారు 2 గంటలకు, మహులిలో ఓ ఇల్లు కూలిపోయిందని కోత్వాలి పోలీసులకు సమాచారం అందింది. పోలీసులు, అగ్నిమాపక బృందాలు వెంటనే ఘటనా స్థలానికి చేరుకుని సహాయక, రెస్క్యూ చర్యలు ప్రారంభించాయి. శిథిలాల నుంచి ఏడుగురినీ బయటకు తీసి జిల్లా ఆసుపత్రికి తరలించగా, అక్కడ వైద్యులు ఆరుగురు మరణించినట్లు ప్రకటించారు.ఈ హృదయ విదారక ప్రమాదంలో, అమాయక పిల్లలతో సహా ఒకే కుటుంబానికి చెందిన ఆరుగురు చనిపోయారు.