మణిపూర్లో ఉగ్రవాదులు మరోసారి ఘాతుకానికి ఒడిగట్టారు. ఉఖ్రుల్ జిల్లాలో అస్సాం రైఫిల్స్ కాన్వాయ్ లక్ష్యంగా చేసుకుని జరిపిన అనాగరిక మెరుపు దాడిలో ఇద్దరు జవాన్లు వీరమరణం పొందారు. జాతీయ రహదారి 202 పై ప్రయాణిస్తున్న 40వ అస్సాం రైఫిల్స్ సైనిక బలగాల వాహనాలే గురిగా ఉగ్రవాదులు ఒక్కసారిగా ఎదురుకాల్పులకు తెగబడ్డారు. ఈ దారుణ దాడిలో వారెంట్ ఆఫీసర్ బల్వంత్ సింగ్, డ్రైవర్గా విధులు నిర్వర్తిస్తున్న హవల్దార్ సీఎం. సింగ్ అక్కడికక్కడే ప్రాణాలు కోల్పోయారు.
ఉఖ్రుల్ పోలీస్ స్టేషన్ పరిధిలోని నౌంగ్షాంగ్ కాంగ్ గ్రామం సమీపంలో ఈ ఘోరం చోటుచేసుకుంది. తాజా దాడితో సరిహద్దు పరిసర ప్రాంతాల్లో తీవ్ర ఉద్రిక్త పరిస్థితులు నెలకొనడంతో భద్రతా బలగాలు భారీ ఎత్తున మోహరించాయి. ప్రస్తుతం దట్టమైన అటవీ ప్రాంతాన్ని తమ ఆధీనంలోకి తీసుకున్న ప్రత్యేక బలగాలు.. ఉగ్రవాదుల ఉనికి కోసం కట్టుదిట్టమైన చర్యలతో కూంబింగ్ ఆపరేషన్ నిర్వహిస్తున్నాయి.
ఉఖ్రుల్ సరిహద్దు పరిధిలో కుకీలు, నాగాల మధ్య గత కొన్ని వారాలుగా తీవ్ర ఉద్రిక్తతలు కొనసాగుతున్నాయి. ఫిబ్రవరి 7న జరిగిన ఒక చిన్న సామాన్య పరస్పర వివాదం కాస్తా పెరిగి పెద్దదై రెండు వర్గాల మధ్య తీవ్ర ఘర్షణలకు దారితీసింది. నాటి నుంచి ఇరు వర్గాల మధ్య చోటుచేసుకున్న పలు దాడులలో ఇప్పటివరకు దాదాపు 25 మంది ప్రాణాలు కోల్పోవడం గమనార్హం. ఈ నేపథ్యంలోనే వ్యూహాత్మకంగా జవాన్ల కాన్వాయ్ను లక్ష్యంగా చేసుకుని ఐఈడీ (IED) పేలుడుతో ఈ దారుణానికి ఒడిగట్టారని భద్రతా సంస్థలు అనుమానిస్తున్నాయి. తాజా ఘాతుకంతో సరిహద్దు ప్రాంతాల్లో శాంతిభద్రతలపై తీవ్ర ఆందోళనలు వ్యక్తమవుతున్నాయి. ఈ ఘోర దాడి నేపథ్యంలో ఇరు సామాజిక వర్గాల మధ్య సోషల్ మీడియా వేదికగా తీవ్ర ఆరోపణలు నడుస్తున్నాయి. సీనాకీతల్, సారేఖోంగ్, థోయీ వంటి సరిహద్దు గ్రామాల్లో సంచరిస్తున్న కొన్ని అనుమానాస్పద సాయుధ ముఠాలపై భద్రతా సంస్థలు ఎటువంటి చర్యలు తీసుకోవడం లేదని కుకీ సంఘాలు నేరుగా ఆరోపిస్తున్నాయి. మరోవైపు ఈ ఆరోపణలను నేషనల్ సోషలిస్ట్ కౌన్సిల్ ఆఫ్ నాగాలాండ్ (NSCN-IM) తీవ్రంగా తోసిపుచ్చింది. తమ నుంచి విడిపోయిన కొన్ని తీవ్రవాద గ్రూపులే కావాలనే ఇలాంటి దాడులకు పాల్పడుతున్నాయని వారు ఒక ప్రకటనలో స్పష్టం చేశారు. ఈ ప్రాంతంలో శాంతియుత వాతావరణాన్ని నాశనం చేసే చర్యలతో తమకు ఎలాంటి సంబంధం లేదని, కేంద్ర ప్రభుత్వంతో జరుగుతున్న చారిత్రక శాంతి చర్చలకు తాము కట్టుబడి ఉన్నామని వారు పునరుద్ఘాటించారు. ఈ పిరికిపంద ఉగ్రవాద దాడిని మణిపూర్ ముఖ్యమంత్రి ఖేమ్చంద్ యుమ్నమ్ తీవ్రంగా ఖండించారు. దేశం కోసం ప్రాణాలర్పించిన అమర వీరుల త్యాగాలు వృథా పోవని ఆయన స్పష్టం చేశారు. మణిపూర్ ప్రాంతంలో అలజడి సృష్టించాలని చూస్తున్న నిందితులను త్వరలోనే గుర్తించి కఠినంగా శిక్షిస్తామని భరోసా ఇచ్చారు. మణిపూర్ గవర్నర్ అజయ్ కుమార్ భల్లా కూడా అమర జవాన్ల కుటుంబాలకు తన గాఢ సానుభూతిని తెలియజేస్తూ ఈ దారుణ చర్యను తీవ్రంగా వ్యతిరేకించారు. సరిహద్దుల్లో అదనపు బలగాలను మోహరించి శత్రువుల ఆట కట్టించాలని ఆదేశించారు.ముదురుతున్న జాతుల ఘర్షణ.. అంతటా ఆందోళన!
సోషల్ మీడియాలో ఆరోపణల పర్వం..
ఉగ్రదాడిపై సీఎం, గవర్నర్ తీవ్ర ఆగ్రహం