స్కాట్లాండ్ గ్లాస్గో వేదికగా జరుగుతున్న కామన్వెల్త్ గేమ్స్లో భారత అథ్లెట్ల హవా కొనసాగుతోంది. జావెలిన్ త్రో లో భారత్కు డబుల్ ధమాకా ధమాకా లభించింది. భారత స్టార్ అథ్లెట్, టోక్యో ఒలింపిక్ విజేత నీరజ్ చోప్రా రజత పతకాన్ని కైవసం చేసుకోగా, మరో భారత యువ సంచలనం యశ్వీర్ సింగ్ కాంస్యంతో మెరిశాడు. ఒకే కేటగిరీకి చెందిన పోడియంపై ఇద్దరు భారతీయ అథ్లెట్లు నిలవడం ఓ నూతన అధ్యాయానికి తెర తీసినట్టయింది. ఈ కేటగిరీలో బంగారం పతకం మాత్రం చేజారడం కొంత నిరాశను మిగిల్చింది.
వెన్నునొప్పి కారణంగా గత ఏడాది సెప్టెంబర్ నుంచి జావెలిన్ త్రో కు దూరమైన నీరజ్ చోప్రా.. రీఎంట్రీలో అదరగొట్టాడు. ఇటీవలే దోహా డైమండ్ లీగ్ ద్వారా పునరాగమనం చేశాడు. ఈ ఏడాది జూన్ 19న జరిగిన ఆ పోటీలో ఆయన 85.69 మీటర్లతో నాలుగో స్థానంలో నిలిచాడు. ఇప్పుడు కామన్వెల్త్ గేమ్స్ లో తన స్థానాన్ని మరింత మెరుగుపర్చుకున్నాడు. రెండో ప్రయత్నంలో 85.83 మీటర్ల దూరం బల్లెం విసిరి ఈ సీజన్లో అత్యుత్తమ ప్రదర్శన నమోదు చేశాడు.
2018 గోల్డ్ కోస్ట్ కామన్వెల్త్ గేమ్స్లో స్వర్ణం గెలిచిన నీరజ్.. ఇప్పుడు రజతంతో సరిపెట్టుకున్నప్పటికీ తన హవా తగ్గలేదని నిరూపించుకున్నాడు. మరోవైపు.. తన తొలి కామన్వెల్త్ గేమ్స్లోనే యశ్వీర్ సింగ్ తడాఖా చూపాడు. ఏకంగా కాంస్యపతకాన్ని ముద్దాడాడు. ఆరో ప్రయత్నంలో 85.41 మీటర్ల దూరం వెల్లం విసిరి కాంస్య పతకాన్ని తన సొంతం చేసుకున్నాడు. ఇంతకుముందు అతని వ్యక్తిగత అత్యుత్తమ రికార్డు 83.72 మీటర్లుగా ఉండేది. దీన్ని మెరుగుపర్చుకున్నట్టయింది. ఈ పోటీల్లో శ్రీలంక అథ్లెట్ రుమేష్ తరంగ పతిరాగే అంచనాలకు తగ్గట్టే రాణించాడు. స్వర్ణ పతకాన్ని గెలుచుకున్నాడు. రెండో ప్రయత్నంలో 89.75 మీటర్ల దూరం ఈటెను సంధించాడు. అగ్రస్థానాన్ని కైవసం చేసుకున్నారు. ఈ బెంచ్ మార్క్ ను నీరజ్ అందుకోలేకపోవడం నిరాశకు గురి చేసింది. అయినప్పటికీ.. రజతం, కాంస్యం భారత్ ఖాతాలో పడటం ఓ రికార్డుకు నాంది పలికింది. అదే సమయంలో జావెలిన్ త్రో పతకాల పట్టికలో మొదటి మూడు స్థానాలనూ కూడా దక్షిణాసియా అథ్లెట్లే సాధించాడం ప్రాధాన్యతను సంతరించుకుంది. ఈ పోటీల్లో పాల్గొన్న మూడో అథ్లెట్ రోహిత్ యాదవ్ 81.56 మీటర్ల ప్రదర్శనతో ఏడో స్థానంతో సరిపెట్టుకున్నాడు. ఈ టోర్నీలో కొందరు దిగ్గజ అథ్లెట్లకు నిరాశే ఎదురైంది. పాకిస్తాన్కు చెందిన డిఫెండింగ్ ఛాంపియన్, ఒలింపిక్ గోల్డ్ మెడలిస్ట్ అర్షద్ నదీమ్ 77.41 మీటర్లకే చతికిలపడ్డాడు. మొదటి మూడు రౌండ్లలోనే పోటీ నుండి నిష్క్రమించాడు. అలాగే ట్రినిడాడ్ అండ్ టొబాగోకు చెందిన వరల్డ్ ఛాంపియన్ కెషార్న్ వాల్కాట్ 82.55 మీటర్ల త్రోతో ఆరో స్థానంలో నిలిచాడు. నేటి నుంచే.. వంటగ్యాస్ సిలిండర్ల రేట్లు సవరణ- అమలు
తిరుమలకు వచ్చే భక్తులకు టీటీడీ సూచనలు- విస్తృత ప్రచారం