గాలి కూతురు పెళ్లంటే మాటలా?: శుభలేఖే ఇలావుంటే(వీడియో)

బెంగళూరు: అక్రమ మైనింగ్ కేసులో అరెస్టై ఆ తర్వాత విడుదలైన కర్ణాటక మాజీ మంత్రి గాలి జనార్ధన్ రెడ్డి తన కూతురు బ్రాహ్మణి వివాహ వేడుకకు బెంగళూరులో భారీ ఏర్పాట్లు చేస్తున్నారు. కాగా, ఇప్పుడు ఆ పెళ్లికి సంబంధించిన శుభలేఖలో హాట్ టాపిక్‌గా మారాయి.

ఎందుకంటే ఇంత వరకు ఎవరూ చేయని ప్రయోగం చేశారు గాలి జనార్ధన్ రెడ్డి. ఆ శుభలేఖ చూస్తేనే తన కూతురు పెళ్లి ఎంత ఘనంగా జరిపిస్తారో అనే విషయం తెలిసిపోయేలా రూపొందించారు. ఇంతకీ ఏం చేశారంటే.. శుభలేఖ ఒక బాక్సులో ఉంటుంది.. ఆ బాక్సు తెరవగానే ఎల్ఈడీ స్క్రీన్‌పై గాలి వారి వివాహ వీడియో పాట మొదలవుతుంది.

ఈ వీడియోలో జనార్ధన్ రెడ్డి, ఆయన సతీమణి లక్ష్మితోపాటు కుమారుడు, కూతురు బ్రాహ్మణి, కాబోయే అల్లుడు రాజీవ్ రెడ్డి కనిపిస్తారు. నవంబర్ 16న జరిగే బ్రాహ్మణి, రాజీవ్‌ల వివాహానికి హాజరు కావాలంటూ ఆ పాటలో ఉంటుంది. శివలింగానికి పూజ చేస్తూ గాలి దంపతులుండగా, మిగితా వారు కూడా వారిద్దకు చేరుకుంటారు.

ప్రస్తుతం భారీ ఖర్చుతో రూపొందించిన ఈ ఎల్ఈడీ వీడియో శుభలేక దేశ వ్యాప్తంగా సంచలనంగా మారింది. మీడియాతోపాటు సోషల్ మీడియాలోనూ పాపులర్‌గా మారింది. గాలి జనార్ధన్ రెడ్డి కూతురు పెళ్లంటి మామూలు విషయమా? అన్నట్లు చేస్తున్నారని పలువురు వ్యాఖ్యానిస్తున్నారు.

English summary

Gali Janardhan Reddy, a former Karnataka minister and mining baron, has given a whole new twist to the big fat Indian wedding.