తెలంగాణపై సోనియా గాంధీ దిగివస్తారా?
రాజీనామాల విషయంలో పట్టు వీడబోమని అంటున్న పార్లమెంటు సభ్యుల ఒత్తిడికి సోనియా గాంధీ తలొగ్గుతారా అనేది కూడా చర్చనీయాంశంగానే ఉంది. తెలంగాణ ఇస్తామని చెప్తే తప్పితే తాము వెనక్కి తగ్గబోమని తెలంగాణ పార్లమెంటు సభ్యులు గట్టిగానే చెబుతున్నారు. అయితే, సోనియాకు అది అంత సులభమైన విషయం కాదు. తెలంగాణ ప్రాంత ప్రజాప్రతినిధులకు కాంగ్రెసు సీమాంధ్ర ప్రజాప్రతినిధులు కూడా ప్రతివ్యూహం రూపొందిస్తున్నారు. తెలంగాణ ప్రాంత ప్రజాప్రతినిధులు రాజీనామాలకు సోనియా తలొగ్గితే సీమాంధ్ర ప్రాంత ప్రజాప్రతినిధులు కూడా రాజీనామాలు చేసే ప్రమాదం ఉంది. ఈ పరిస్థితిని అధిగమించడం సోనియా గాంధీకి అంత సులభమేమీ కాదు.
నిజానికి, కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ నోటి వెంట సోనియా మనోగతం బయటపడిందని అంటున్నారు. తెలంగాణ రాష్ట్ర ఏర్పాటు ప్రక్రియను ప్రారంభిస్తున్నామని కేంద్ర హోం మంత్రి చిదంబరం ప్రకటనకు ముందటి వాదనను, ఇంకా చెప్పాలంటే - 2004 ఎన్నికలకు ముందటి వాదనలను ఆజాద్ ముందుకు తెచ్చారు. అప్పటి నుంచి ఇప్పటి వరకు తెలంగాణ విషయంలో సంభవించిన పరిణామాలను ఆయన గుర్తించకుండా మాట్లాడారు. ఏకాభిప్రాయం కోసం ప్రయత్నాలు జరగాలనే మాట ఆయన అన్నారు. అందువల్ల, తెలంగాణ రాష్ట్రం ఇస్తామనే హామీ కాకుండా ఏం చెప్పి తెలంగాణ ప్రాంత ప్రజాప్రతినిధులను సోనియా తన దారికి తెచ్చుకుంటారనేది ఆసక్తికరమైన విషయమే.