జగన్ తో రోశయ్య బిగ్ ఫైట్

మరో మూడు నెలల్లో ముఖ్యమంత్రిగా తొలి వార్షికోత్సవం జరుపుకోనున్నారు రోశయ్య. అయితే ఆయనకు టిడీపి నుంచి కంటే జగన్ వర్గీయుల నుంచే ఇప్పటివరకు వ్యతిరేకత ఎదురైంది. రాష్ట్రం వైయస్ సొంత రాజ్యమన్నట్టు, తాను రాజకుమారుడినన్నట్టు జగన్ వ్యవహరించడం రోశయ్యకు భరించలేని విషయంగా మారింది. ఇక హై కమాండ్ పై ఆధారపడకుండా జగన్ వర్గాన్ని యుక్తిగా చితగ్గొట్టడానికి ఆయన నిర్ణయం తీసుకున్నట్టు కన్పిస్తోంది.

వైయస్‌ ఉన్నప్పుడు నిధుల విడుదల ఆగలేదని, తాను మాత్రమే వాటిని నిలుపుదల చేసి బీసీలకు వ్యతిరేకంగా వ్యవహరిస్తున్నానన్నట్లుగా కృష్ణయ్యతో జగనే ఆందోళన చేయించి, బీసీలను తనపైకి ఉసిగొల్పుతున్నారని రోశయ్య అనుమానిస్తున్నట్లు తెలుస్తోంది. సాక్షి దినపత్రికలో కూడా రోశయ్యకు వ్యతిరేక కథనాలు వస్తున్నాయి. ఆ అసహనంతోనే రోశయ్య 'వైయస్‌ దేవుడు, నేను రాక్షసుడినా" అంటూ ఇటీవల ఆగ్రహం వ్యక్తం చేయవలసి వచ్చింది.

జగన్‌ తనను కుల సంకటంలో ఇరికించి, నాయకులతో బీసీ వ్యతిరేక ముద్ర వేయడం వల్లే రోశయ్య కూడా దానికి పై ఎత్తుగా వైయస్‌ వర్గీయులైన బీసీ మంత్రులతోనే వైయస్‌ హయాం నుంచి ఫీజుల బకాయిలు ఉన్నాయంటూ ప్రకటింపచేశారని పార్టీ వర్గాలు విశ్లేషిస్తున్నాయి. గురువారం విలేకరుల సమావేశం నిర్వహించి, వైయస్‌ జమానా నుంచి ఫీజుల బకాయిలున్నాయని ప్రకటించిన 8 మంత్రుల్లో ఆరుగురు పూర్తిగా జగన్‌ మద్దతుదారులే కావడంతో..రోశయ్య వ్యూహాత్మకంగా వ్యవహరించి వారినే తెరపైకి తెచ్చి జగన్‌ వ్యూహాన్ని దెబ్బకొట్టారని పార్టీ వర్గాలు చెబుతున్నాయి.