కమల్ హాసన్ 'పద్మ'కు 'విశ్వరూపం' టోపీ?

న్యూఢిల్లీ: విశ్వరూపం సినిమాతో ప్రముఖ నటుడు కమల్ హాసన్ రెంటికి చెడ్డ రేవడి అయినట్లే ఉన్నారు. విశ్వరూపంపై పెద్ద యెత్తున వివాదం చెలరేగడంతో ఆయనకు పద్మ భూషన్ అవార్డు దూరమైనట్లు వినికిడి. మరోవైపు, సినిమా అనుకున్న రీతిలో విడుదల కాకపోవడంతో మరో రకంగా ఆయన దెబ్బ తిన్నారు. కమల్ హాసన్ పేరు పద్మ భూషన్ అవార్డుల జాబితాలో చివరి క్షణం వరకు ఉన్నట్లు తెలుస్తోంది.

విశ్వరూపం సినిమాపై వివాదం చెలరేగడంతో ఎందుకొచ్చిన తంటా అనుకున్నారో ఏమో చివరి నిమిషంలో ఆయన పేరును కొట్టేశారట. మైనారిటీల మనోభావాలను దెబ్బ తీశారనే ఆరోపణపై విశ్వరూపం సినిమాను తమిళనాడు ప్రభుత్వం నిషేధించింది. హైదరాబాదు, బెంగళూర్ నగరాల్లో ఆ సినిమా శుక్రవారం విడుదల కాలేదు.

కమల్ హాసన్‌కు పద్మ భూషన్ అవార్డు ఇవ్వాలా, లేదా అనే డైలమాలో ప్రభుత్వం పడిందని, దానివల్లనే పద్మ అవార్డుల ప్రకటనలో జాప్యం జరిగిందని అంటున్నారు. కమల్ హాసన్‌కు ఇప్పటికే పద్మశ్రీ అవార్డు లభించింది. ఆయనకు అత్యధిక ఉత్తమ నటుడి అవార్డులు వచ్చాయి. మొత్తం 24 మందికి పద్మ భూషన్ అవార్డులు ఇస్తే, అందులో 8 అవార్డులు కళారంగానికే వచ్చాయి. నటుడు రాజేష్ ఖన్నాకు, నటి షర్మిళా ఠాగోర్‌కు ఈ అవార్డులు వచ్చాయి.

కమల్ హాసన్ పేరును రాష్ట్ర ప్రభుత్వం పద్మ భూషన్ అవార్డుకు నామినేట్ చేసింది. అయితే, చివరి నిమిషంలో ఆయన పేరును కేంద్ర ప్రభుత్వం తుది జాబితా నుంచి తొలగించింది.

English summary

Buz is that actor Kamal Haasan’s name was on the list of Padma Bhushan contenders, but the government had to drop it at the very last moment due to the recent controversy surrounding his film Vishwa­roopam