చైనాలో వింత: కళ్లు లేని శిశువు జననం
బీజింగ్: తనకు జన్మించిన శిశువుని చూసి ఓ కన్న తల్లి ఆందోళనకు లోనైన సంఘటన చైనాలో చోటు చేసుకుంది. ఇంతకీ ఆమె అంతలా ఆందోళన చెందడానికి కారణం ఏంటని అనుకుంటున్నారా? తనకు జన్మించిన శిశువుకు కళ్లు లేకపోవడమే. చైనా మీడియా కూడా ఈ సంఘటనపై పెద్ద ఎత్తున వార్తలు ప్రచురించాయి.
వివరాల్లోకి వెళితే... ఈ నెల 20న చైనాలోని గాంగ్జౌ ప్రాంతానికి చెందిన లీ పెయ్హువా పండంటి మగ బిడ్డకు జన్మినిచ్చింది. అయితే ఆ శిశువుకు కళ్లు లేవు. వెంటనే ఆ శిశువుని గాంగ్జౌ ప్రావిన్స్లో ఉన్న ప్రముఖ వైద్య నిపుణులకు చూపించింది. ప్రతి పది వేల మందిలో 30 మంది మాత్రమే ఇలా జన్మిస్తారని వైద్యులు తెలిపారు.
అనోఫ్తాల్మియా అనే అవలక్షణాల వల్లే ఇలా జరుగుతుందని చికిత్స అనంతరం వైద్యులు తెలిపారు. గర్భం దాల్చినప్పటి నుంచి అన్ని పరీక్షలు చేయించుకున్నామని, ఎలాంటి లోపాలు కనిపించలేదని లీ పెయ్హువా కుటుంబ సభ్యులు తెలిపారు. అసలు ఇలా ఎలా ఎందుకు జరిగిందో తమకు అర్థంకావడం లేదని వాపోయారు.
గర్భధారణ సమయంలో తీసే ఆల్ట్రాసౌండ్ లేదా ఇతర టెస్టుల్లో ఈ అనోఫ్తాల్మియా లక్షణాలు తెలియవని వైద్యులు పేర్కొన్నారు. దీంతో పాటు మరేమైనా ఆరోగ్య సమస్యలు ఉన్నాయా? అనే కోణంలో శిశువుకు కుటుంబ సభ్యులు పరీక్షలు చేయిస్తున్నామని చెప్పారు.