అమెరికా పోలీస్ అదుపులో షారుక్!: 'సుష్మని అడగాల్సింది'
ముంబై: బాలీవుడ్ నటుడు షారుక్ ఖాన్కు మరోసారి చేదు అనుభవం ఎదురైంది. అమెరికాలోని లస్ ఏంజిల్స్ విమానాశ్రయంలో ఇమ్మిగ్రేషన్ అధికారులు అతనిని అడ్డుకున్నారు. దీనిపై ఆయన సామాజిక అనుసంధాన వేదిక ట్విట్టర్ ద్వారా ఆగ్రహం వ్యక్తం చేశారు.
షారుక్ ఖాన్ను ఎయిర్ పోర్టు బయటకు వెళ్లనీయకుండా అదుపులోకి తీసుకొని ప్రశ్నించారు. దీంతో తనకు ప్రతిసారి అవమానం జరగడంపై షారుక్ ఆవేదన వ్యక్తం చే శారు. ఎప్పుడు అమెరికా వచ్చినా తనకు ఇలానే అవుతోందని అభిప్రాయపడ్డారు.
తనకు సెక్యూరిటీ బాధ్యతలు తెలుసునని, తాను సెక్యూరిటీని గౌరవిస్తానని, కానీ నేను అమెరికా వచ్చిన ప్రతిసారి అడ్డుకుంటున్నారని షారుక్ ఆవేదన వ్యక్తం చేశారు. దీనిపై ట్విట్టర్లో స్పందన వస్తోంది.
షారుక్ ఖాన్ కేంద్ర విదేశాంగ శాఖ మంత్రి సుష్మా స్వరాజ్ను సంప్రదించాలని, అయితే, ఆమెను సౌమ్యంగా అడగటం మరువవద్దని, ఆమె సాయం చేస్తుందని కొందరు ట్వీట్లు చేశారు. అమెరికా ఇమిగ్రేషన్ అధికారులు కొన్ని బాలీవుడ్ చిత్రాలను చూడాలని, ఇంత పెద్ద హీరోను అన్నిసార్లు ఎలా నిర్బంధిస్తారని, అమెరికా అధికారులు షారూక్ ఫ్యాన్స్ కాబట్టే, ఓ రెండు గంటలు అతనితో గడిపేందుకు ఇలా చేస్తున్నారని జోకులు పేలుస్తున్నారు.