నా భర్తకు మంచి భార్య కావాలి: హృదయాలను కదిలిస్తున్న ఆమె లేఖ

ఇలాంటి కథతో చాలానే సినిమాలు వచ్చాయి... కానీ, ఇది నిజ జీవితం జరిగితే చాలా బాధగానే ఉంటుంది. తన ప్రాణం పోతుందని తెలిసిన ఓ మహిళ.. తన భర్త తదుపరి జీవితం సాఫీగా ఉండాలని కోరుకుంది.

న్యూయార్క్‌: ఇలాంటి కథతో చాలానే సినిమాలు వచ్చాయి... కానీ, ఇది నిజ జీవితం జరిగితే చాలా బాధగానే ఉంటుంది. తన ప్రాణం పోతుందని తెలిసిన ఓ మహిళ.. తన భర్త తదుపరి జీవితం సాఫీగా ఉండాలని కోరుకుంది. అంతేగాక, అతనికి ఓ మంచి భార్యను చూసే బాధ్యతను కూడా తనపైనే వేసుకుంది. తన భర్తకు ఓ మంచి భార్య కావాలంటూ వేట కొనసాగించింది.

ప్రముఖ పిల్లల క‌థ‌ల ర‌చ‌యిత్రి ఆమీ క్రూజ్ రోసెంతాల్‌కు ఇలాంటి పరిస్థితి ఏర్పడింది. తాను చ‌నిపోయే ముందు త‌న భ‌ర్త‌కు మ‌రో మంచి భాగ‌స్వామిని తానే వెతికి పెట్టాల‌నుకుంటున్న‌ది ఆమీ క్రూజ్‌. అందుకే 'యూ మె వాంట్ టు మ్యారీ మై హ‌జ్బెండ్' పేరుతో న్యూయార్క్ టైమ్స్ ప‌త్రిక‌లో ఓ కథనం కూడా రాసిందామె. అందులో త‌న భ‌ర్త ఎంత మంచివాడో.. అత‌నిని పెళ్లి చేసుకోవ‌డం ఎవరికైనా ఎంత అదృష్ట‌మో వివరించింది.

ఇది చ‌దివిన ప్ర‌తి ఒక్క‌రూ ఆమె పట్ల సానుభూతి వ్యక్తం చేశారు. 26 ఏళ్లుగా త‌న భ‌ర్త‌తో క‌లిసి ఉంటున్నాన‌ని, మ‌రో 26 ఏళ్లు కూడా క‌లిసి ఉండాల‌ని ఉన్నా.. త‌న‌కు ఆ అవ‌కాశం లేద‌ని ఆమె తన కథనంలో రాసింది. ఐదు అడుగుల ప‌ది అంగుళాలు ఉండే త‌న భ‌ర్త జేస‌న్‌ ఓ లాయ‌ర్ అని, వంట చేయ‌డం, లైవ్ మ్యూజిక్ విన‌డాన్ని ఎంజాయ్ చేస్తాడ‌ని ఆమె పేర్కొంది.

ఓ క‌ల‌ల రాకుమారుడి కోసం మీరు ఎదురు చూస్తుంటే.. జేస‌న్ మీకు త‌గిన వ్య‌క్తి అవుతాడ‌ని ఆమీ క్రూజ్ పేర్కొనడం గమనార్హం. అత‌నికి త‌గిన అమ్మాయి దొరికాల‌ని, మ‌రో ల‌వ్‌స్టోరీ మొద‌లు కావాల‌ని తాను కోరుకుంటున్న‌ట్లు ఆమీ రాసుకొచ్చారు. కాగా, ప్రస్తుతం ఆమె లేఖ నెట్‌లో వైర‌ల్‌గా మారి అనేక హృదయాలను కదిలిస్తోంది.

English summary

Get the tissues ready for this one. Amy Krouse Rosenthal, a renowned children’s book author who was diagnosed with terminal cancer a little over a year ago, wrote a heartbreaking essay for The New York Times’ “Modern Love” section on Friday, March 3, encouraging women to date her husband of 26 years, Jason.