పార్లమెంట్‌ను సాగనివ్వం

న్యూఢిల్లీ: తహల్కా దోషులపై ప్రభుత్వం చర్య తీసుకునే వరకు పార్లమెంట్‌ కార్యకలాపాలను తమపార్టీ ముందుకు సాగనివ్వదని ఆర్‌జెడి నేత లాలూ ప్రసాద్‌ యాదవ్‌ ప్రకటించారు. ఈ విషయంలో తమ పార్టీ వైఖరి స్పష్టంగా వున్నదని ఆయన చెప్పారు.

ప్రభుత్వం వత్తిడికి తలవొగ్గి ప్రశ్నోత్తరాల సమయాన్ని సజావుగా సాగనిచ్చిన ఇతర ప్రతిపక్షపార్టీలను ఆయన విమర్శించారు. తహల్కా వ్యవహారం తేలేదాకా ప్రశ్నోత్తరాల సమయాన్ని సాగనివ్వడం అర్ధం లేదని ఆయన అన్నారు. ఏ ప్రశ్న అడిగినా అది తహల్కా మీదకే వెళ్తుందని ఆయన చెప్పారు. తహల్కా విషయంలో దోషులపై చర్యతీసుకోని పక్షంలో ఈ ప్రభుత్వాన్ని ప్రశ్నలు అడిగి కూడా ప్రయోజనం లేదని ఆయన అన్నారు. ప్రభుత్వాన్ని అడిగే ప్రశ్న ఒక్కటేనని తహల్కా దోషులను దేశంలోపలి జైలుకు పంపిస్తారా లేక దేశం వెలుపల జైలుకు పంపిస్తారా అని ఆయన వ్యాఖ్యానించారు.