ఎన్నికల ప్రభావం బిజెపి పై లేదు

న్యూఢిల్లీ: ఇటీవల జరిగిన అయిదు రాష్ట్రాల అసెంబ్లీ ఎన్నికల్లో తమ పార్టీ పనితీరును సమీక్షించేందుకు బిజెపి జాతీయ కార్యవర్గం రెండు రోజుల సమావేశాలు ఉత్తరాంచల్‌లోని ముస్సోరిలో ఆదివారం నాడు ప్రారంభమయ్యాయి. ఈ ఎన్నికల్లో పరాజయానికి కారణాలను విశ్లేషించడంతో పాటు ఈ ఫలితాల ప్రభావం పార్టీ పై ఏవిధంగా వున్నదనే అంశంపై కూడా సమవేశంలో చర్చిస్తున్నారు.

ఈ ఎన్నికల ఫలితాల వల్ల తమ పార్టీకి ఇసుమంత కూడా నష్టం జరగలేదని బిజెపి అధ్యక్షుడు జనా కృష్ణమూర్తి స్పష్టం చేశారు. త్వరలో జరుగనున్న ఉత్తరప్రదేశ్‌ అసెంబ్లీ ఎన్నికలు అసలు సవాలని కాంగ్రెస్‌ పార్టీకి చేతనైతే తమను ఆ ఎన్నికల్లో ఎదుర్కోవాలని ఆయన సవాలు విసిరారు. జమ్మూకాశ్మీర్‌, ఉత్తరప్రదేశ్‌, పంజాబ్‌ అసెంబ్లీ ఎన్నికలకు సంబంధించి ఇప్పటినుంచే అనుసరించాల్సిన వ్యూహాలపై కూడా ఈ సమావేశం చర్చిస్తున్నది. కేంద్ర హోమంత్రి అద్వానీ ఈ సమావేశానికి హాజరవుతున్నారు. ఇదిలా వుండగా మణిపూర్‌లో కోయిజమ్‌ ప్రభుత్వానికి మద్దతు నిచ్చే విషయంలో సమతాపార్టీ నుంచి వస్తున్న వత్తిడులకు బిజెపి తలవొగ్గింది. సోమవారం నాడు జరుగనున్న బలపరీక్షలో కోయిజమ్‌ ప్రభుత్వానికి మద్దతు నివ్వాలని బిజెపి నాయకులు నిర్ణయించారు.