ప్రియాంకకు అప్పుడే రాజకీయాలా?

వాషింగ్టన్‌ః తన కుమార్తె ప్రియాంక ఇప్పట్లో రాజకీయాల్లో ప్రవేశించే అవకాశాలు లేవని కాంగ్రెస్‌ పార్టీ అధ్యక్షురాలు సోనియాగాంధీ ప్రకటించారు. అయితే భవిష్యత్తులో ప్రియాంక రాజకీయాల్లోకి వచ్చే అవకాశాలు లేకపోలేదని ఆమె చెప్పారు. రాజకీయాల్లోకి రావాలా? వద్దా? అనేది ప్రియాంక ఇష్టం అని వాషింగ్టన్‌ లోవిలేకరులతో ఇష్టాగోష్టిగా మాట్లాడుతూ సోనియా అన్నారు.

భారత రాజకీయాలను ఆకళింపు చేసుకొనేందుకు తన కుమారుడు రాహుల్‌ గాంధీ, కుమార్తె ప్రియాంక ఎప్పుడూ ఆసక్తి చూపుతారని ఆమెవివరించారు. క్రియాశీల రాజకీయాల్లోకి రావాలా వద్దా అనేదిమీ ఇష్టం అని వారికి ఎప్పుడూ చెబుతూ వుంటాను. అయితే వారు ఇప్పట్లో రాజకీయాల్లోకి వచ్చే అవకాశాలు లేవని సోనియా స్పష్టం చేశారు. రాజకీయాల పట్ల ప్రియాంకు ఆసక్తి ఎక్కువని, ఆమెకు సమర్థురాలైన నాయకురాలిగా ఎదిగే లక్షణాలున్నాయని సోనియా అన్నారు. అమేథీలో తన ఎన్నికల ప్రచారం మొత్తాన్ని ప్రియాంక సొంతంగా నడిపించిందని ఆమెవివరించారు.

నన్ను రాజకీయాల్లో చేరమని నా భర్త ఎప్పుడూ ఒత్తిడి చేయలేదు. ఆ అంశాన్ని నా ఇష్టానికే వదిలేశారు. స్వతంత్ర వాతావరణంలో పెరిగిన రాహుల్‌, ప్రియాంక రాజకీయ రంగప్రవేశం గురించి వారే నిర్ణయం తీసుకుంటారని సోనియా అన్నారు.