ఆర్టీసి సమ్మె: చర్చలు మొదలు

హైదరాబాద్‌: ఆంధ్రప్రదేశ్‌ రాష్ట్ర రోడ్డు రవాణా సంస్థ(ఎపిఎస్‌ఆర్‌టిసి) కార్మికుల సమ్మె పరిష్కార దిశగా సాగుతోంది. ప్రభుత్వానికి, కార్మికుల ప్రతినిధులకు మధ్య మంగళవారం చర్చలు ప్రారంభమయ్యాయి. ప్రభుత్వం తరఫున మంత్రి వర్గ ఉపసంఘం సభ్యులు టి. దేవేందర్‌ గౌడ్‌, బి.వి. మోహర్‌ రెడ్డి, కార్మికుల తరఫున కార్మిక సంఘాల సంయుక్త కార్యాచరణ కమిటీ కన్వీనర్‌ బి.రామారావు, తదితరులు పాల్గొన్నారు.

వేతనాల సవరణ, మోటారు వాహనాల పన్నులపై కార్మికుల డిమాండ్లు పరిష్కారం కావచ్చునని భావిస్తున్నారు. అయితే, చర్చలు వెంటనే ఫలితం ఇచ్చే సూచనలు లేవని జెఎసి కన్వీనర్‌ బి. రామారావు అన్నారు. చర్చలు ఏ మాత్రం ముందుకు సాగలేదని ఆయన అన్నారు. పరిష్కార దిశగా చర్చలు ప్రారంభమయ్యాయని హోం మంత్రి టి. దేవేందర్‌ గౌడ్‌ అన్నారు.

ఇదిలా వుంటే, మంగళవారం 16వ రోజు కూడా రాష్ట్ర వ్యాప్తంగా రాస్తారోకోలు, పికెటింగ్‌లు, ధర్నాలు జరిగాయి. ఆందోళనకారులను అనేక మందిని పోలీసులు అదుపులోకి తీసుకున్నారు.ఆందోళనకారులు బస్సులను అడ్డుకోవడానికి ప్రయత్నించారు. హన్మకొండలో ఆందోళనకారులు బస్సుల అద్దాలు పగులగొట్టారు. ఇందుకు బాధ్యులైన 40 మందిని పోలీసులు అదుపులోకి తీసుకున్నారు.విశాఖపట్నంలో వామపక్షాలు ప్రదర్శన నిర్వహించాయి. గుంటూరులో ఆందోళనకారులు టైర్లలో గాలి తీసేసి బస్సులనుఆపారు.

తిరుపతిలో అద్దె బస్సుల టైర్లలో గాలి తీసేయడానికి ప్రయత్నించిన ఏడుగుర్ని పోలీసులు అదుపులోకి తీసుకున్నారు.శ్రీకాకుళంలో ఆర్టీసి కార్మికుల సమ్మెకు మద్దతుగా డివైఎఫ్‌ఐ, ఎస్‌ఎఫ్‌ఐ కార్యకర్తలు మానవహారం ఏర్పాటు చేశారు. హైదరాబాద్‌లో వామపక్షాలు మౌన ప్రదర్శన నిర్వహించాయి.

తెలుగు మ్యాట్రిమోనిలో మీకు నచ్చిన జీవిత భాగస్వామి ఎంపికలు - రిజిస్ట్రేషన్ ఉచితం!