ముంబయ్‌ః 1993 డిసెంబర్‌ 13న ముంబయ్‌ లో జరిగినపేలుళ్ళతో తనకు సంబంధం లేదని ప్రముఖ సినీనటుడు సంజయ్‌ దత్‌ స్పష్టం చేశారు. ఎ.కె-56రైఫిల్‌ కలిగి వున్న సంజయ్‌ దత్‌ ఆ తరువాత దానిని ధ్వంసం చేసినట్లు సిబిఐ సంజయ్‌ దత్‌ పై కేసు నమోదు చేసింది. ఈ కేసుకు సంబంధించి ఆయన మంగళవారం నాడు టాడా కోర్టు ఎదుటహాజరయ్యారు. నిర్మాతలు సమీర్‌, చవాన్‌ లు ఆయుధాలు నింపుకున్న వాహనంలో తన ఇంటికి వచ్చారనే సిబిఐ ఆరోపణలను సంజయ్‌ దత్‌ నిర్ద్వంద్వంగా ఖండించారు.

ఇందుకు సంబంధించి ఓ పోలీస్‌ కానిస్టేబుల్‌ చెప్పిన సాక్ష్యం కేవలం కల్పితం అని సంజయ్‌ దత్‌ లాయర్లు వాదించారు.

నిర్మాతలు ఆయుధాలు నింపిన కారులో సంజయ్‌ దత్‌ ఇంటికి రాగా వాటిలో నుంచి ఎకె-56రైఫిల్‌ మాత్రం తీసుకొని మిగిలిన వాటిని తీసుకెళ్ళాల్సిందిగా కోరినట్లు సిబిఐ ఆరోపించింది. ముంబయ్‌పేలుళ్ళ కేసులో ప్రధాన నిందితుడైన సమీర్‌ హింగోరా అతని సహచరుడు ఖండావాలా నుంచి సంజయ్‌ దత్‌రైఫిల్‌ తీసుకున్నాడని సిబిఐ ఆరోపించింది. అయితే ఈవిషయాన్ని కూడా దత్‌ ఖండించారు.