హిందూజాలపై చార్జిషీటు కొట్టివేత

న్యూఢిల్లీ: 640మిలియన్ల బోఫోర్స్‌ చెల్లింపు కేసులో ముగ్గురు హిందూజా సోదరులపై దాఖలయిన చార్జిషీట్‌ను ఢిల్లీ హైకోర్టు సోమవారం కొట్టివేసింది. దాఖలు చేయడానికి కేంద్ర దర్యాప్తు సంస్థ(సిబిఐ) సెంట్రల్‌ విజిలెన్స్‌ కమిషన్‌ ఆమోదం తీసుకోకపోవడంతో చార్జిషీటును కొట్టివేయాలని హిందూజా సోదరులు పిటిషన్‌పెట్టుకున్నారు. ఈ పిటిషన్‌ను అనుమతిస్తూ చార్జిషీటును కొట్టి వేసినట్లు జస్టిస్‌ ఆర్‌.ఎస్‌. సోధీ చెప్పారు.

చట్టప్రకారం సిబిఐ తాజాగా చార్జిషీటును దాఖలు చేసేవీలుంటుంది. వినీత్‌ నారాయణ్‌ కేసులో సుప్రీంకోర్టు జారీ చేసిన మార్గదర్శక సూత్రాలకు అనుగుణంగా సిబిఐ తాజా చార్జిషీటు దాఖలు చేయాలని జడ్జి సూచించారు. సిబిఐ,సెంట్రల్‌ విజిలెన్స్‌ కమిషన్‌ తమ చట్టపరమైన విధులను నిర్వర్తించకపోవడాన్ని ఆయన తప్పు పట్టారు. హిందూజా సోదరులకు సుప్రీంకోర్టు ఇచ్చిన షరతులతో కూడిన బెయిల్‌ కొనసాగుతుందని జడ్జి సోధి చెప్పారు.