బ్యాట్స్‌మెన్‌ విశ్వాసం సడలింది:రైట్‌

వెల్లింగ్టన్‌: న్యూజిలాండ్‌ పర్యటనలో భారత బ్యాట్స్‌మెన్‌విశ్వాసం సడలిపోయిందని కోచ్‌ జాన్‌ రైట్‌ అంగీకరించారు.వీరి నైతిక స్థయిరాన్ని పెంపొందించేందుకు ఏదైనా చేయాల్సి వుంటుందని ఆయన ఆదివారంనాడు అన్నారు.

కొందరికి టచ్‌ పోయిందని, దీంతోవిశ్వాసం సడలిపోయిందని, కానీ ఈ పరిస్థితి కొనసాగనివ్వబోమని ఆయన అన్నారు. ఇప్పుడువికెట్ల వద్ద నిలబడడంపై, పూర్తి యాభై ఓవర్లు ఆడడంపై బ్యాట్స్‌మెన్‌ దృష్టి కేంద్రీకరించాల్సి వుంటుందని, ప్రస్తుతం తన శక్తినంతా దీనిపైనే పెడుతున్నానని ఆయన అన్నారు. ఈ పరిస్థితిలో ఇది బ్యాట్స్‌మెన్‌ పోరాట లక్షణానికి పరీక్ష అని,వికెట్ల వద్ద నిలదొక్కుకోవడమే ఇప్పుడు కావాల్సిందని, పరుగులు చేయడం కాదని ఆయన అన్నారు. ఈ పిచ్‌లమీద స్థిరంగా 200 పరుగులు చేస్తే అది సరైన స్కోర్‌ అవుతుందని ఆయన అన్నారు.