27న సింగరేణి కోల్‌బెల్ట్‌ బంద్‌

హైదరాబాద్‌: తమ డిమాండ్ల సాధనకు సింగరేణి కార్మిక సంఘాలు ఈ నెల 27వ తేదీన కోల్‌బెల్ట్‌ బంద్‌కు పిలుపునిచ్చాయి. సమ్మె పరిష్కారానికి శనివారం జరిగిన చర్చలు కూడా విఫలం కావడంతో 27వ తేదీన బంద్‌ జరుగుతుందని సంఘాలు ప్రకటించాయి.

తమ డిమాండ్ల సాధన కోసం చేస్తున్న సింగరేణి కార్మికుల సమ్మె శనివారం నాలుగో రోజుకు చేరుకుంది. రామగుండంలోని 16 అండర్‌ గ్రౌండ్‌, 4 ఓపెన్‌ క్యాస్ట్‌ మైన్స్‌లో సమ్మె సంపూర్ణంగా జరిగింది. ఇదిలావుంటే, పనుల్లో పని చేయడానికి పూనుకున్న కార్మికులపై దాడి చేశారంటూ పోలీసులు కొందరు కార్మిక సంఘాల నాయకులపై కేసులు పెట్టారు. శాంతియుతంగా సమ్మె చేస్తున్న తమపై అక్రమ కేసులు బనాయించారని కార్మిక సంఘాల నాయకులంటున్నారు.