మాజీ ఎమ్మెల్యే రవీంద్రారెడ్డిపై దాడి

అనంతపురం: గోరంట్ల మాజీ శాసనసభ్యుడు, కాంగ్రెస్‌ నాయకుడు రవీంద్రా రెడ్డిపై గుర్తు తెలియని వ్యక్తులు దాడి చేశారు. ఈ దాడి శుక్రవారం తెల్లవారుజామున జరిగింది.

గోరంట్ల మండలం పాముదుర్తిలోని రవీంద్రారెడ్డి ఇంటిపై బాంబులతో, ఇతర మారణాయుధాలతో దాడి చేశారు. ఈ దాడిలో రవీంద్రారెడ్డి తీవ్రంగా గాయపడి ఆస్పత్రిలో చికిత్స పొందుతున్నారు. ఇంటి వద్ద బాంబులు వదిలి వెళ్లడంతో రవీంద్రారెడ్డిపై దాడి చేసింది నక్సలైట్లని అనుమానిస్తున్నారు. అయితే రవీంద్రరెడ్డి మాత్రం ఈ విషయాన్ని ఖండిస్తున్నారు. తనపై మంత్రి నిమ్మల కిష్టప్ప మద్దతుదారులు దాడి చేశారని ఆయన ఆరోపిస్తున్నారు. ఈ దాడికి ఆగ్రహం చెందిన రవీంద్రారెడ్డి మద్దతుదారులు ప్రత్యర్థి రంగారెడ్డి జీపును దగ్ధం చేశారు.