జమ్మూలో నలుగురు పౌరులు బలి

జమ్మూ: జమ్మూ డివిజన్‌లోని రాజౌరి జిల్లాలో మిలిటెంట్లు నలుగురు పౌరులను కాల్చి చంపారు. మిలిటెంట్లు జరిపిన కాల్పుల్లో మరో ఇద్దరు గాయపడ్డారు. ఈ సంఘటన సోమవారం రాత్రి జరిగినట్లు అధికార వర్గాలు చెప్పాయి.

మిలిటెంట్లు సోయిట్‌ గ్రామంలోని ఒక దుకాణంలోకి ప్రవేశించి విచక్షణారహితంగా కాల్పులు జరిపారు. ఈ కాల్పుల్లో దుకాణుదారుతో పాటు మరో ముగ్గురు కస్టమర్లు అక్కడికక్కడే మరణించారు.

ఆ తర్వాత మిలిటెంట్లు రాజౌరీ నుంచి జమ్మూ వెళ్తున్న ట్రక్కుపై కాల్పులు జరిపారు. ఈ కాల్పుల్లో ట్రక్కు డ్రైవర్‌, క్లీనర్‌ తీవ్రంగా గాయపడ్డారు. గాయపడిన ఇద్దరిని జమ్మూలోని ప్రభుత్వ వైద్య కళాశాల ఆస్పత్రిలో చేర్పించారు.