భారత సంతతి టెక్నోలకు మైక్రోసాఫ్ట్ తాఖీదులు
హైదరాబాద్: భారత టెక్నోలకు మైక్రోసాఫ్ట్ మానవ వనరుల విభాగం తాఖీదులు జారీ చేసింది. అమెరికాలో, యునైటెడ్ కింగ్డమ్లో, ఇతర దేశాల్లో పని చేస్తున్న భారత సంతతికి చెందిన టెక్నోక్రాట్స్కు మార్గదర్శక సూత్రాలతో కూడిన మెమోను మైక్రోసాఫ్ట్ జారీ చేసింది. ఈ మెమోపై మైక్రోసాఫ్ట్ కార్పోరేషన్ మానవ వనరుల డైరెక్టర్ స్టీవ్ రైడర్ జారీ చేశారు. ఈ మెమోలో భారత సంతతికి చెందిన హిందీ మాట్లాడే టెక్నోక్రాట్లు పాటించాల్సిన ఏడు మార్గదర్శక సూత్రాలు వున్నాయి.
హిందీ భాష మాట్లాడే తమ ఉద్యోగులు ఇతరులను బాధపెట్టే భాష వాడుతున్నట్లు తమ కార్పోరేట్ హెడ్క్వార్టర్స్ను సందర్శించిన పలువురు అధికారులు తమ దృష్టికి తెచ్చారని, ఆ విధమైన ప్రవర్తన తమ విధానాన్ని ఉల్లంఘించడమే కాకుండా వృత్తివ్యతిరేకమని, సందర్శకులనూ సహోద్యోగులను బాధపట్టడమేనని రైడర్ ఆ మెమోలో అన్నారు. కొన్ని హిందీ పదాల వాడకాన్ని విరమించుకోవాలని ఆయన ఉద్యోగులకు సూచించారు. ఆ హిందీ పదాలను ఆయన వరుసగా క్రోడీకరించిన మార్గదర్శక సూత్రాలలో పొందుపరిచారు. అవన్నీ అసభ్యకరమైన పదాలే కావడం విశేషం. నిరసనను వ్యక్తం చేయడానికి, దూషించడానికి సాధారణంగా వాడే అసభ్యకరమైన పదాలు అవి. ఈ మెమో చదివిన తర్వాత అనకూడదని హిందీ వాక్యాన్ని కూడా ఆయన మెమోలో పొందుపరిచారు. ఈ మార్గదర్శక సూత్రాలను పాటిస్తారని ఆశిస్తున్నట్లు ఆయన చివరగా పేర్కొన్నారు.