హాలివుడ్‌ నటి అంజెలినీ జోలీ బాడీగార్డుల అరెస్టు

ముంబాయి: హాలీవుడ్‌ సినీనటి అంజెలినా జోలీ బాడీగార్డులను ముగ్గురని ముంబాయి పోలీసులు శుక్రవారం ఉదయం అరెస్టు చేశారు. ముంబాయిలోని ఒక పాఠశాలలో ఆమె నటిస్తున్న ఎ మైటీ హార్ట్‌ సినిమా షూటింగ్‌ సందర్భంగా దౌర్జన్యానికి దిగినందుకు గాను పోలీసులు వారిని అరెస్టు చేశారు. సినిమా షూటింగ్‌ కోసం గురువారం మధ్యాహ్నం అంజుమన్‌ - ఎ - ఇస్లామ్‌ పాఠశాలకు చేరుకోవడంతో సమస్య మొదలైంది. అది పాఠశాల తరగుతులు అయిపోయే సమయానికి చిలికి చిలికి గాలివానగా మారింది. ఈ అరెస్టులను జోన్‌ -1 డిప్యూటీ పోలీసు కమీషనర్‌ బ్రజేష్‌ సింగ్‌ ధృవీకరించారు. అయితే వారిపై మోపిన అభియోగాలను వెల్లడించడానికి నిరాకరించారు.

పాఠశాల ఆవరణలో అంజెలినా జోలి సినిమా షూటింగ్‌ను చూడడానికి మొదట విద్యార్థుల తల్లిదండ్రులు ఆసక్తి ప్రదర్శించారు. ఆ తర్వాత గగ్గోలుకు దారి తీసింది. అంజెలినా జోలీ బాడీగార్డులు తమను అసభ్యంగా దూషించారని, జాతి పేరుతో కూడా వారు దూషించారని తల్లిదండ్రులు అంటున్నారు. ఆ పాఠశాలను పాకిస్తానీ పోలీసు స్టేషన్‌గా సినిమాలో చూపించేందుకు ఏర్పాట్లు చేసుకుని షూటింగ్‌ ప్రారంభించారు.