ఘనతలన్నీ మావే: చంద్రబాబు

హైదరాబాద్: వినూత్న పథకాలను చేపట్టిన ఘనత తమ పార్టీదేనని తెలుగుదేశం పార్టీ అధ్యక్షుడు నారా చంద్రబాబు నాయుడు అన్నారు. వినూత్న పథకాల వైపు తమ పార్టీ ఎప్పుడూ మొగ్గు చూపుతోందని ఆయన అన్నారు. పార్టీ ఎన్నికల ప్రణాళికను ఆయన గురువారం మీడియా ప్రతినిధుల సమావేశంలో విడుదల చేశారు. తమ ప్రభుత్వ హయాంలో చేపట్టిన కార్యక్రమాల వల్ల ప్రభుత్వ ఆదాయం పెరిగిందని ఆయన చెప్పుకున్నారు. తాము చేపట్టిన ఆర్థిక సంస్కరణల వల్ల రాష్ట్రాదాయం పెరిగిందని ఆయన అన్నారు. తాము అభివృద్ధికి, సంక్షేమ కార్యక్రమాలకు పెద్ద పీట వేశామని ఆయన చెప్పారు.

కలర్ టీవీలు ఇస్తామని తాము ఇచ్చిన హామీకి కాంగ్రెసు, ప్రజారాజ్యం పార్టీ నాయకులు గింజుకుంటున్నారని, ఏం చేయాలో వారికి తోచడం లేదని ఆయన అన్నారు. ముఖ్యమంత్రి వైయస్ రాజశేఖర రెడ్డి కార్యక్రమాలన్నీ మేడిపండులాంటవని ఆయన అన్నారు. పేదల కోసం నగదు బదిలీ పథకం చేపడుతున్నట్లు ఆయన తెలిపారు. ఆరోగ్యశ్రీ పథకాన్ని సమగ్రంగా అమలు చేస్తామని ఆయన చెప్పారు. కాంగ్రెసు ఉపాధి హామీ పథకం అవినీతిమయంగా మారిందని ఆయన అన్నారు.

తెలంగాణపై తాము స్పష్టంగా ఉన్నామని, తెలంగాణ రాష్ట్ర ఏర్పాటుకు అవసమైన చట్టపరమైన చర్యలన్నీ తీసుకుంటామని ఆయన చెప్పారు. రైతుల రుణాలను అన్నింటినీ మాఫీ చేయిస్తామని ఆయన చెప్పారు. సన్నకారు, చిన్నకారు రైతులకు వడ్డీ లేకుండా రుణాలు ఇస్తామని ఆయన చెప్పారు. రైతులకు 12 గంటల పాటు పగటి పూట కరెంట్ ఇస్తామని ఆయన చెప్పారు. తాము అధికారంలోకి వస్తే చేపట్టే పలు అభివృద్ధి, సంక్షేమ పథకాల గురించి ఆయన వివరించారు.