చిరంజీవికి 'మా' అభినందనలు

హైదరాబాద్‌: ప్రజారాజ్యం పార్టీ అధినేత చిరంజీవిని సినీ కళాకారుల సంఘం(మా) బృందం మంగళవారం పార్టీ కార్యాలయంలో కలిసింది. ప్రజారాజ్యం శాసనసభాపక్ష నేతగా ఎంపికైనందుకు ఆయనకు అభినందనలు తెలిపింది. 'మా' వ్యవస్థాపక అధ్యక్షుడైన చిరంజీవి రాజకీయ జీవితం బాగుండాలని ఆకాంక్షించింది. రాజమండ్రిలో మురళీమోహన్‌ తక్కువ తేడాతో ఓడిపోయారని, భవిష్యత్తులో ఆయన గెలిచి పార్లమెంట్‌కు వెళ్లాలని ఆశిస్తున్నట్లు ఈ సందర్భంగా చిరంజీవి అన్నారు.

ప్రజా సమస్యలతోపాటు సినీ కార్మికుల సమస్యల పరిష్కారానికి కృషి చేస్తానని తెలిపారు. రాజకీయాల్లో జయాపజయాలు సహజమని, తమ మధ్య ఎలాంటి విభేదాల్లేవని 'మా' అధ్యక్షుడు మురళీమోహన్ వ్యాఖ్యానించారు. 'మా' బృందంలో ఏవీఎస్‌, ఆహూతి ప్రసాద్‌, అశోక్‌ కుమార్‌, మహర్షి రాఘవ, బ్రహ్మాజీ తదితరులు ఉన్నారు.