తెలంగాణ పరిష్కారం కాలేదు: వైయస్

హైదరాబాద్: రాష్ట్ర ప్రజలు తెలుగుదేశం పార్టీ అధ్యక్షుడు నారా చంద్రబాబు నాయుడు ఇచ్చిన ఆల్ ఫ్రీ వాగ్దానాలను విశ్వసించలేదని ముఖ్యమంత్రి డాక్టర్ వైయస్ రెడ్డి చెప్పారు. ఎపియుడబ్ల్యుజె గురువారం ఏర్పాటు చేసిన మీట్ ది ప్రెస్ కార్యక్రమంలో ఆయన ప్రసంగించారు. తాము విశ్వసనీయత, సాహసోపేతమైన ప్రభుత్వాన్ని అందించామని ఆయన చెప్పారు. మేళ్లు చేసే ప్రభుత్వంగా తమను ప్రజలు గుర్తించారని ఆయన అన్నారు. డబ్బులు లేవనే సాకుతోనో, విమర్శలు వస్తున్నాయనో తాము వెనక్కి తగ్గలేదని, ప్రజల అవసరాలను అన్నింటినీ తీర్చామని ఆయన చెప్పారు.డిప్యూటీ ముఖ్యమంత్రి ఏర్పాటు ఆలోచనే లేదని ఆయన స్పష్టం చేశారు.

తమ విశ్వసనీయతకు, వంచనకు జరిగిన ఎన్నికల్లో ప్రజలు తమపై విశ్వాసాన్ని వ్యక్తం చేశారని ఆయన చెప్పారు. తెలుగుదేశం పార్టీ ప్రభుత్వం పేదలను పట్టించుకోలేదని ఆయన అన్నారు. అభివృద్ధిని, సంక్షేమాన్ని రెండు కళ్లుగా భావిస్తున్నామని ఆయన చెప్పారు. జలయజ్ఞం, మౌలిక వసతుల కల్పనలకు ఇబ్బంది కలగకుండా సంక్షేమ పథకాలను కొనసాగిస్తామని ఆయన చెప్పారు. పార్టీకి మేలు చేసేవారిని మరిచిపోయే సమస్య లేదని ఆయన ఒక ప్రశ్నకు సమాధానంగా చెప్పారు. ఎదిగే కొద్ది ఒదగాలని పార్టీ కార్యకర్తలను కోరుతున్నట్లు ఆయన తెలిపారు.

తెలంగాణ ఇవ్వకూడదనే ఉద్దేశం తమకు లేదని, ఒక రాష్ట్రం ఏర్పడినప్పుడు ఎదురయ్యే కొత్త సమస్యలు ఎదురవుతాయని, ఆ సమస్యలకు పరిష్కార మార్గాలను కనుక్కున్న తర్వాత కొత్త రాష్ట్రం ఏర్పాటు చేయడానికి వీలవుతుందని ఆయన అన్నారు. తెలంగాణ సమస్యకు ఎన్నికలు పరిష్కారం చూపాయని తాను అనుకోవడం లేదని ఆయన అన్నారు. ఎన్నికలు ఒక్క సమస్యపై జరగలేదని ఆయన చెప్పారు. తెలంగాణ సమస్యపైననే కాకుండా ఇతర సమస్యలపై కూడా తాము దృష్టి పెడతామని ఆయన చెప్పారు. అన్ని ప్రాంతాల అభివృద్ధికి కృషి సమగ్రాభివృద్ధి సాధిస్తుందని ఆయన చెప్పారు. తెలంగాణపై కాంగ్రెసు స్పష్టంగా ఉందని ఆయన చెప్పారు. తెలంగాణ సెంటిమెంట్ ఉందని తెలుసునని, కొన్ని ప్రాంతాల్లో ఎక్కువగా కొన్ని ప్రాంతాల్లో తక్కువగా ఉందని, ఉన్నదాన్ని నాయకులు ఎక్కువ చేసే పద్ధతి కూడా ఉందని ఆయన ఒక ప్రశ్నకు సమాధానంగా అన్నారు.తెలుగుదేశం పార్టీ అధ్యక్షుడు నారా చంద్రబాబు నాయుడు తన ప్రభుత్వ హయాంలో చంద్రశేఖరరావును మంత్రివర్గంలోకి తీసుకుని ఉంటే తెరాస వచ్చేది కాదని ఆయన అన్నారు.

కాంగ్రెసులో వర్గ విభేదాలపై వేసిన ప్రశ్నకు సమాధానమిస్తూ కాంగ్రెసులో వర్గాలు లేవని, ఉన్న వర్గం ఒక్కటే అని, అది సోనియా వర్గమని ఆయన అన్నారు. విధానాల్లో, కార్యక్రమాల్లో తాము ప్రధానమైన మార్పులను వేటినీ ప్రతిపాదించలేదని, అమలు చేస్తున్న కార్యక్రమాలను మరింత బాగా, పారదర్శకంగా అమలు చేస్తామని ఆయన చెప్పారు. మరింత సమర్థంగా ప్రస్తుత కార్యక్రమాలను అమలు చేయడమే తమ ముందుందని ఆయన చెప్పారు.