దాడులపై ఆస్ట్రేలియా ప్రధాని సారీ

న్యూఢిల్లీ: భారత విద్యార్థులపై వరుస దాడుల విషయంలో ఆస్ట్రేలియా ప్రభుత్వం మన ప్రభుత్వ ఒత్తిడికి తలొగ్గింది. భారత విద్యార్థులపై జరుగుతున్న దాడులకు ఆస్ట్రేలియా ప్రధాని కెవిన్ రుడ్ క్షమాపణలు చెప్పారు. దాడులను ఆయన దురదృష్టకరంగా అభివర్ణించారు. భారత ప్రధాని మన్మోహన్ సింగ్ కు ఆయన క్షమాపణలు చెప్పారు.

ఏ విధంగా చూసినా భారత విద్యార్థులపై దాడులను ఖండించాల్సిందేనని రుడ్ అన్నారు. మన్మోహన్ సింగ్ తో ఆయన ఫోన్ లో మాట్లాడారు. దాడులు నేరపూరిత చర్యలని, దొంగతనం కోసం మాత్రమే జరిగాయని, జాతి వివక్ష దాడులని చెప్పడానికి వీలు లేదని ఆయన అన్నారు. దాడులపై ఆయన తీవ్ర ఆక్షేపణ తెలియజేశారు. భారత విద్యార్థులపై మే 9వ తేదీ నుంచి వరుసగా దాడులు జరుగుతున్న విషయం తెలిసిందే.