విమాన ప్రమాదంలో 228 మృతి

పారిస్‌: 228 మంది ప్రయాణీకులతో బ్రెజిల్‌ నుంచి పారిస్‌ బయలుదేరిన విమానం మాయమైంది. ఈ అదృశ్యం అయిన ఎయిర్‌ ఫ్రాన్స్‌ విమానం అట్లాంటిక్‌ సముద్రంలో కూలినట్లు అధికారులు ధృవీకరించారు. దాంతో ఈ విమానంలో 228 మంది ప్రయాణికులు చనిపోయినట్లే నని నిర్ణయించారు. బ్రెజిల్‌ వైమానిక, నావికా దళాలు రంగంలోకి దిగి విమాన శకలాల కోసం గాలింపు చర్యలు చేపట్టారు. ఎఫ్‌ 447 పేరు గల ఈ విమానంలో 216 మంది ప్రయాణికులు, 12 మంది సిబ్బంది ఉన్నారు.

రియో డీ జానిరియో విమానశ్రయం నుంచి ఆదివారం రాత్రి 7 గంటలకు బయలుదేరింది. అది పారిస్‌ లోని చార్లెస్‌ డిగాలే విమానాశ్రయంలో సోమవారం ఉదయం 11.15 గంటలకు దిగాల్సి ఉంది. అయితే ఆ విమానం నుంచి రేడియో సంకేతాలు అందకుండా పోయినట్లు అధికారవర్గాలు వెల్లడించాయి. ఈ విమానం అట్లాంటిక్‌ మహాసముద్ర గగనతలంపై ప్రయాణిస్తుండగా, ఎయిర్‌ ట్రాఫిక్‌ కంట్రోల్‌ వ్యవస్థతో సంబంధాలు తెగిపోయినట్లుగా తెలుస్తున్నది.

భారత కాలమానం ప్రకారం సోమవారం ఉదయం ఏడున్నర గంటల ప్రాంతంలో ఈ సంఘటన జరిగింది. విమానంలో షార్ట్‌ సర్క్యూట్‌ జరిగి, ప్రయాణీకులందరికీ విద్యుదాఘాతం సంభవించి విమానం సముద్రంలో కూలిపోయి ఉండవచ్చునని సాంకేతిక నిపుణులు భావిస్తున్నారు.